Aımaqtar • 04 Qazan, 2019

Aýdandaǵy alǵashqy kınoteatr

335 ret

kórsetildi

1 mın

oqý úshin

Aýyl jastarynyń da jańa zaman ıgilikterinen qalys qalmaı, jańalyqtardan habardar bolyp otyrýy mańyzdy. Elbasy jarııalaǵan Jastar jyly osy baǵyttaǵy biraz ıgi isterge jol ashty. Túrli memlekettik baǵdarlamalar arqyly baspanaly bolyp, jumysqa ornalasyp, kásip ashyp jatqan jastardyń qatary kóp. Qur sendelip júrmeı, bos ýaqyttaryn tıimdi ótkizý de jastardyń jaman ádetterge boı aldyrmaýlaryna septigin tıgizedi. Jastarǵa arnalǵan jobalar men ortalyqtar Atyraý oblysynyń barlyq aýdandarynda bar. Al Inder kentinde elimizdegi aýdan ortalyqtarynyń arasynan alǵash ret jańa formattaǵy kınoteatr ashyldy. Bul da «Jastar jylynyń» tartýy.

Baqytgúl BABASh

«3D Lazer» sońǵy úlgidegi kınoteatry - aýdan ákimdigi men «Meloman» kompanııasynyń birikken jobasy. Inderdegi «Jastar ortalyǵynda» ornalasqan 200 oryndyq kınoteatrdyń ashylý saltanatynda aýdan ákimi Meıirim Qalaýı: «Elbasy men Prezıdenttiń memlekettik saıasatyna sáıkes azamattardyń qolaıly ómir súrýlerine tolyq jaǵdaı jasalýy qajet. Aýdan turǵyndaryna arnalǵan alǵashqy kınoteatrdyń ashylýy da osy saıasattyń nátıjesi. Osy ıgi isterge bastamashyl bolyp, qoldaý kórsetkeni úshin aımaq basshysy Nurlan Asqarulyna alǵysymyzdy bildiremiz», - dedi.

Aýdan turǵyndary jańa kınoteatrdan rejısser Aqan Sataevtyń «Tomırıs» fılmin tamashalady. Endi alystaǵy aýyl halqy da jańa fılmderdi elimizdegi iri kınoteatrlarmen qatar kóre alady.

ATYRAÝ