33 jastaǵy Ýkraına boksshysy qazaq jankúıerlerine jaqsy tanys. Dúnıejúzilik boks serııasynyń (WSB) alǵashqy maýsymynda (2010-2011 jyldary) Italııanyń «Milano Thunders» klýby sapynda óner kórsetip, sol jarystyń eń úzdik boksshysyna tıesili arnaıy syılyqty ıelendi. 2012-2014 jyldary «Astana arlandarynyń» namysyn abyroımen qorǵap, qazaqstandyq komandamen birge chempıondyq tájdi ıelendi. WSB dodasynda barlyǵy 24 kezdesý ótkizgen Sergeı Derevıanchenko bir ǵana básekede jeńildi. Qalǵan 23 jekpe-jekti óz paıdasyna sheshti. Kezinde onyń qazaqtyń uly Qanat Islamdy jeńgeni de jankúıerlerdiń jadynda.
2014 jyly aıtýly boksshy kásipqoılar arasynda kúsh synasýǵa bel býdy. Osy kúnge deıin 14 márte rıngke kóterilip,
13 ret jeńiske jetti. 10 qarsylasyn esinen tandyrdy. Byltyrǵy jyldyń qazan aıynda Derevıanchenko amerıkalyq Danıel Djeıkobsten jeńildi.
О́ziniń sońǵy jekpe-jegin ýkraınalyq óren bıylǵy jyldyń sáýir aıynda germanııalyq Djek Kýlkaıǵa qarsy ótkizip, upaı sanymen utty.
«Medıson Skver Gardendegi» aıqasqa Sergeı Derevıanchenkonyń tas-túıin daıarlyqpen kelgeni birden baıqaldy. Ol ataǵy jer jarǵan Gennadıı Golovkınmen esh qaımyqpaı aıqasty. Birinshi raýndta ashyq aıqasqa barǵan Ýkraınanyń myqtysy aýyr soqqy jiberip alyp, nokdaýnǵa tústi. Onyń ústine jerlesimiz onyń qabaǵyn jardy.
Desek te Sergeıdiń saǵy synǵan joq. Ol únemi shabýyldap, bizdiń boksshyny sharshatyp, dińkeletkisi keldi. Biraq Gena da namysty qoldan bergen joq. Ol da jıi-jıi soqqylaryn jumsap, qarsylasynyń damyldaýyna esh múmkindik bergen joq.
Joǵary qarqynda ótken básekeniń ekinshi jartysynda qos sańlaq ta sharshaı bastady. Bir-birine kóptegen soqqy jumsaǵanymen, olar kóbine qıys ketip jatty nemese alǵashqy raýndtardaǵydaı qýatty bolmady. 10-raýndta Derevıanchenkonyń siltegen judyryǵy Golovkınge dál tıip, táltirektep qaldy. Biraq abyroı bolǵanda aıaǵynda turdy. Odan keıin de «jan alysyp, jan berisken» aıqas jalǵasty. Ekeýi de jankeshtiliktiń shynaıy úlgisin kórsetti. Báseke aıaqtalǵannan keıin úsh tóreshiniń barlyǵy da GGG-diń myqtylyǵyn biraýyzdan moıyndady – 115-112, 115-112, 114-113.
Compubox saıty usynǵan statıstıkalyq málimetke júginsek,
osy aıqas barysynda Golovkın 720 soqqy jumsap, sonyń 243-i qarsylasyna dál tıdi. Bul – 33,8 paıyzdyq kórsetkish! Derevıanchenko 738 ret judyryǵyn siltegen eken. Sonyń 230-y nátıjeli boldy. Bul – 31,2 paıyzdyq kórsetkish!
Osylaısha, 37 jastaǵy Gennadıı Golvkın IBF jáne IBO nusqalary boıynsha álem chempıony atandy. Bul – onyń kásipqoı rıngtegi 40-shy jeńisi. 35 básekeni GGG nokaýtpen aıaqtady. Bir ret utylyp, taǵy bir jekpe-jekte teń esep tirkeldi.
Osy boks keshinde judyryqtasqan taǵy bir jerlesimiz Álı Ahmedov amerıkalyq Endrıý Ernandesti 44 sekýndta uryp qulatyp, ekinshi orta salmaqtaǵy WBC International Silver nusqasy boıynsha altyn belbeýin saqtap qaldy.
