«Halyq Arenada» ótetin dúbirli dodada Alekseı Mıshın, Eterı Týtberıdze, Elena Vodorezova syndy álemge áıgili bapkerlerdiń úzdik shákirtteri óner kórsetedi. Osy sharaǵa Iýko Kavagýtı men Aleksandr Smırnov bastaǵan mánerlep syrǵanaý sportynyń bir shoǵyr juldyzdary qurmetti qonaq retinde arnaıy shaqyrylyp otyr.
«Denıs Tenniń qory» qoǵamdyq qorynyń uıymdastyrýymen ótetin týrnırdiń júlde qory da qomaqty. Atap aıtsaq, erler men áıelder arasyndaǵy saıysta bas júlde oljalaǵan sportshylar 5 myń AQSh dollaryn qaltaǵa bassa, kúmis jáne qola júldegerler $3,5 myń jáne $2 myńdy enshileıdi. Sporttyq bı jáne juptyq básekede jeńis tuǵyryna kóterilgen órender $7 myń, $5 myń jáne $3 myńǵa ıelik etedi. Sonymen qatar, jastar býyny arasyndaǵy jarysta daralanǵandar da elderine quralaqan qaıtpaıdy.
Qysqa ǵana ǵumyrynda kóptegen bıik belesterdi baǵyndyryp, talaı ıgi isterdiń basy-qasynda júrgen Denıs byltyrǵy jyldyń jazynda Almaty qalasynda qandyqol qaraqshylardyń qolynan qaza tapty. Ol nebary 25 jasta edi...
