Jabaıy janýarlardy tanystyryp, jaratylystaný bilimin, sondaı-aq tabıǵatty qorǵaýdy nasıhattaýmen qatar sırek kezdesetin, joıylyp bara jatqan ań-qustardyń gendik qoryn saqtap qalýdy maqsat etetin úıirme jumysyna mektep oqýshylaryn kóptep qatystyrý haıýanattar baǵy mamandarynyń turaqty nazarynda. Osy maqsatta áleýmettik jeliler men aqparat quraldarynda haıýanattar baǵyndaǵy janýarlar álemin tanýǵa erekshe qyzyǵýshylyǵy bar balalardy úıirmege qabyldaý týraly únemi aqparattar jaryq kórip keledi. Ǵylymı-ádistemelik bóliminiń mamany Uljanar Álilaevanyń aıtýynsha, úıirmede balalar qorshaǵan ortany, onyń ishinde janýarlar álemin tanýyna mol múmkindik alyp, tabıǵatqa degen meıirimmen ósetin bolady.
Seksen jyldan astam tarıhy bar haıýanattar baǵynyń qurylýy janýarlar álemin jiti tanyǵan maman Myrzahan Tólebaevtyń esimimen tyǵyz baılanysty. Búginde Qaraǵandy, Shymkentte haıýanattar baǵy bar desek, Almatydaǵy baq eń kólemdisi sanalady. Alǵashqy jyldarda haıýanattar baǵyna birdi-ekili taý eshki, arqar, túlki, qaraquıryq, qasqyr, t.b. ákelinse, keıinnen olardyń qatary tolyǵyp 70-ke jýyqtaǵan. Al búgingi kúnniń derekteri akvarıým, ekzotarıým, qustar, jyrtqyshtar, tuıaqtylar, prımattar tárizdi 6 seksııada 377 túrge jatatyn 3453 bas janýardyń bar ekendigin rastaıdy. Olardyń árqaısysynda kásibı mamandar, ǵylymı qyzmetkerler janýarlar álemin zertteýmen aınalysyp keledi. Janýarlardyń minez-qulqy, qorshaǵan ortamen áseri, t.b. mamandardyń turaqty nazarynda. Qazirgi kezde demeýshilerdiń qoldaýymen haıýanattar álemin qyzyqtaýǵa kelýshilerge de qolaıly jaǵdaılar jasalýda. Arnaıy medısınalyq tirektermen qatar ana men balaǵa arnalǵan bólmeler de jasaqtalyp, jekelegen ańdar úshin zamanaýı oryndar jasalýda.
Munda qolǵa tez úırenetin maımyldar, túıeler, tasbaqa, t.b. da janýarlardy taný balalar úshin asa qyzyqty. Aptasyna eki ret ótetin úıirmeniń qazaq tobyna 5-12 jas aralyǵyndaǵy balalar qabyldanýda. Qazirgi kezde qazaq tobynda jıyrmadan astam bala bar.Úıirmeniń alǵashqy dárisinde balalar janýarlar baǵynyń tarıhymen tanysyp, ań-qustar týraly qyzyqty málimetter aldy.
