«Memleket basshysy bilim berý sapasyn arttyrý jáne pedagogterdi qoldaý jóninde tapsyrma berdi. Osy tapsyrma aıasynda mınıstrlik memlekettik JOO rektorlaryna JOO oqytýshylarynyń eńbekaqylaryn 2020 jyldyń 10 qańtaryna deıin 30-dan 50% - ǵa deıin arttyrý mindetin júktedi. Bul sheshimniń naqty negizderi bar. Biz joǵary oqý oryndarynyń bıýdjetterine taldaý júrgizdik. Ol eńbekaqy tóleý qoryn ulǵaıtý úshin rezervterdiń bar ekendigin kórsetti. Búginde birqatar joǵary oqý oryndarynyń oqytýshylary 60-70 myń teńge kóleminde jalaqy alatyn jaǵdaı qalyptasqan. Mundaı saıasatpen sapany talap etý múmkin emes», dep jazdy A. Aımaǵambetov.
Mınıstr EUÝ, Kaspıı ýnıversıteti men Taraz pedagogıkalyq ýnıversıteti sııaqty joǵary oqý oryndary jalaqyny qazirdiń ózinde kóterýdi bastaǵanyn atap ótti.
«Qalǵan memlekettik JOO meniń tapsyrmamdy mindetti túrde oryndaýlary tıis. Sonymen qatar, rektorlardyń aldyna bizdiń JOO-da jumys isteıtin akademıkterdi arnaıy qosymsha aqylar belgileý arqyly qoldaý mindeti qoıyldy. Joǵary oqý oryndarynda akademıkter kóp emes, sondyqtan biz ózimizdiń ǵylymı elıtamyzdy qoldaýǵa mindettimiz. Bul sharalar memlekettik bıýdjetten qosymsha qarajat pen ózge de kúsh-jigerdi qajet etpeıtinin erekshe atap ótkim keledi. Barlyǵy qolda bar múmkindikterdiń sheńberinde. Jas ǵalymdardy qoldaý tetikteri de bolashaqta qarastyrylatyn bolady», dep jazdy Bilim jáne ǵylym mınıstri.
