Bokstan áıelder arasynda álem chempıonaty tuńǵysh ret 2001 jyly uıymdastyryldy. AQSh-tyń Pensılvanııa shtatyna qarasty Skranton dep atalatyn shaǵyn ǵana shaharda jalaýy jelbiregen jarysta 12 salmaq dárejesi boıynsha júldeler sarapqa salyndy. Jalpy esepte Reseı quramasyna teń keler eshkim tabylmady. Olar 4 altyn, 2 kúmis jáne 2 qola medaldi oljalady. 2 altyny men 2 qolasy bar Shvesııa ekinshi oryndy ıelense, Vengrııa (1+4+0), Kanada (1+1+7) jáne AQSh (1+0+3) quramalary úzdik bestiktiń qatarynan kórindi.
2002 jyly Túrkııanyń eń kórikti jerleriniń biri – Antalııada ótken aıqasta Soltústik Koreıa (2+2+1) men Ýkraınanyń (2+1+2) arýlary alymdy kórindi. Odan keıingi oryndarǵa Reseı (1+1+3), Belarýs (1+1+0) jáne Italııa (1+1+0) jaıǵasty.
2005 jyly Máskeýdiń irgesindegi Podolsk qalasynda uıymdastyrylǵan jarysta jergilikti bylǵary qolǵap sheberleri shashalaryna shań juqtyrmaı, 7 altyn, 1 kúmis jáne 4 qolany enshiledi. Odan keıingi satylarǵa Kanada (1+1+2), Úndistan (1+0+4), Vengrııa (1+0+2) jáne Rýmynııa (1+0+1) jaıǵasty.
2006 jyly Úndistannyń astanasy – Nıý-Delıdegi dodada Qazaqstannyń burymdylary óz tarıhynda tuńǵysh ret jeńis tuǵyryna kóterildi. Bul júldeniń ıesi – Nazgúl Boranbaeva. Kezinde kıkbokstan biraz belesti baǵyndyryp, halyqaralyq dárejedegi sport sheberi atanǵan qazaqtyń qaısar qyzy boksqa da tez-aq beıimdelip, 46 kılo salmaq dárejesinde qola medaldi moınyna ildi. Al komandalyq esepte myna eldiń ókilderi eń úzdik nátıjege qol jetkizdi: Reseı (3+0+3), Soltústik Koreıa (2+0+1), Kanada (1+0+2) jáne Túrkııa (1+0+1).
2008 jyly Qytaıdyń Nınbo qalasynda jerlesterimiz joǵarydaǵy nátıjesin qaıtalap, bir qola medalǵa ıelik etti. Bul joly 70 kılo salmaqtaǵy Elena Kolsovanyń baǵy jandy. О́z jerindegi jarysta Aspanasty eliniń arýlary (4+2+4) aldaryna jan salmasa, odan keıingi oryndardy Túrkııa (2+0+2), Kanada (2+0+1), Úndistan (1+1+2) jáne Soltústik Koreıa (1+0+2) ıelendi. Bir aıta keterligi, sońǵy úsh álem chempıonatynda 13 salmaq dárejesiniń júldeler jıyntyǵy sarapqa salyndy.
2010 jyly Barbadostyń Brıdjtaýn qalasynda Qazaqstannyń týy eki márte kókte jelbiredi. 81 kılo salmaqtaǵy Marına Volnova aqtyq synǵa deıin alqynbaı jetip, sheshýshi tusta brazılııalyq Rozelı Feıtlodan utylsa, 46 kılo salmaqtaǵy Nazgúl Boranbaeva qola medaldi moınyna ildi. Karıb teńizi jaǵalaýyndaǵy aralda ótken jarysta myna memleketterdiń boksshylary úzdik nátıje kórsetti: Reseı (2+1+0), Qytaı (1+3+3), Soltústik Koreıa (1+1+0), AQSh (1+0+2) jáne Úndistan (1+0+1). Sol kezden bastap, álem chempıonattaryndaǵy salmaq dárejeleriniń sany 10-ǵa deıin kemidi.
Brıdjtaýndaǵy kórsetkishti otandastarymyz 2012 jyly Sınhýandaoda aına-qatesiz qaıtalady. Bul básekede asa aýyr salmaqtaǵy Juldyz Mamatqulova kúmis alsa, asa jeńil salmaqtaǵy Nazym Qyzaıbaı qolaǵa qol sozdy. Osy tabysynyń arqasynda Qazaqstan quramasy komandalyq saıysta tuńǵysh ret úzdik ondyqtyń sanatynan kórindi. Al aldyńǵy lektegi quramalar mynalar: Qytaı (3+1+1), AQSh (1+2+2), Reseı (1+1+7) jáne Anglııa (1+1+2).
2014 jyly Chedjýde alǵash ret Qazaq eliniń ánurany shyrqaldy. 48 kılo salmaqtaǵy Nazym Qyzaıbaı barlyq qarsylasyn qapy qaldyryp, óziniń myqtylyǵyn moıyndatty. Aqtyq synda altyn qyzymyz úndistandyq Sarjýbala Devıden basym tústi. +81 kılo salmaqtaǵy Lázzat Kúngeıbaeva kúmis medaldi qanaǵat tutty. Fınalda ol reseılik Zemfıra Magomedálıevaǵa jol berdi. Ońtústik Koreıadaǵy jarystyń qorytyndysy boıynsha Reseı (3+1+1), AQSh (2+0+1) jáne Qytaıdy (1+1+2) alǵa jibergen jerlesterimiz tórtinshi orynǵa turaqtady.
2016 jyly Qazaqstannyń astanasynda ótken jarys barsha jankúıerdiń jadynda. Sharshy alańda asqan sheberlik tanytqan qazaqtyń burymdylary 4 altyn jáne 2 qola medaldi jeńip alyp, jalpy esepte birinshi orynǵa kóterildi. Tarqatyp aıtsaq, Nazym Qyzaıbaı (48 kılo), Dına Jolaman (54 kılo), Valentına Halzova (69 kılo) jáne Lázzat Kúngeıbaeva (81 kılo) altynnan alqa taǵynsa, Jaına Shekerbekova (51 kılo) men Aıjan Qojabekova (57 kılo) úshinshi oryndarǵa taban tiredi. Qazaqstannan keıingi úzdik nátıjeler Qytaı (2+2+2), AQSh (1+1+3), Fransııa (1+0+1) jáne Ulybrıtanııaǵa (1+0+1) tıesili.
2018 jyly Nıý-Delıde Jaına Shekerbekova (51 kılo) kúmis jáne Karına Ibragımova (60 kılo) qola medaldi enshilep, Qazaqstan quramasy Gollandııamen birge komandalyq saıysta úzdik ondyqty qorytyndylady. Al eń úzdik nátıjelerge Qytaı (4+1+0), Taıpeı (2+0+0), Úndistan (1+1+2) jáne Germanııa (1+0+1) qol jetkizdi.
Bıyl Ýlan-Ýdede ótken jarysta Qazaqstannyń eń beldi bylǵary qolǵap sheberleriniń barlyǵy da baq synady. О́kinishke qaraı, solardyń deni jarty jolǵa jetpeı súrindi. Máselen, álemniń eki dúrkin chempıony degen dardaı ataǵy bar Nazym Qyzaıbaı (51 kılo) tusaýkeser kezdesýde japonııalyq Sýkımı Namıkıge ese jiberdi. Byltyr dál osy sportshy Nıý-Delıdegi dúnıejúzilik dodanyń jartylaı fınalynda bizdiń Jaına Shekerbekovadan utylǵan edi.
Osydan úsh jyl buryn Qazaq eliniń astanasynda jalaýy jelbiregen álemdik dodada qola medaldi moınyna ilgen Aıjan Qojabekova (57 kılo) alǵashqy aınalymnan asa almady. Ol Gollandııa sportshysyna jol berdi. Dál sol jarysta altyn tuǵyrǵa kóterilgen Dına Jolaman shırek fınalda AQSh boksshysy Nıkaıa Krepsten utyldy. Rıo Olımpıadasynyń qola júldegeri, Azııanyń eki dúrkin chempıony Darıǵa Shákimova (69 kılo) Panamerıka oıyndarynyń jeńimpazy, amerıkalyq Osha Djonstan jeńildi. Bir sózben aıtsaq, Býrıatııada jarys jolyna shyqqan 10 boksshymyzdyń segizi qalyń toptyń arasynda qalyp qoıdy.
Bıylǵy baıraqty básekede júlde alý baqyty tek Mılana Safronova men Dına Islambekovaǵa ǵana buıyrdy. 64 kılo salmaqtaǵy Safronovanyń tájirıbesi óte zor. 28 jastaǵy boksshy osydan birer aı buryn Bangkokta uıymdastyrylǵan Azııa birinshiliginde qola medaldi ıelenip, oǵan deıin birqatar halyqaralyq týrnırlerde atoı saldy. Bastapqy básekeleriniń barlyǵyn jeńispen aıaqtaǵan Mılana jartylaı fınalda ıtalııalyq Anjele Karınıdiń osal tusyn taba almady.
+81 kılo salmaq dárejesinde aıqasqan Dına Islambekovanyń elimizdiń áıelder quramasyna qosylǵanyna asa kóp ýaqyt bola qoıǵan joq. Soǵan qaramastan ol óziniń óreli ónerimen kózge túsip, tórtkúl dúnıeniń myqtylary bas qosqan básekede kúsh synasý qurmetine bólendi. Bul rette 19 jastaǵy qazaq qyzy el senimin aqtady. Dına Ýlan-Ýdedegi dodany qola medalmen qorytyndylady.
