Táýelsizdik saraıynda ótken «Qurmetpen, Qaraǵandydan» atty kórmede sýretshiniń túrli taqyryptaǵy 100-ge tarta jumysy nazarǵa usynyldy. Tabıǵat aıasyna shyǵýdy kóńili súıetin Bagramovtyń plener jumystaryndaǵy qulshynysy kórermenmen ózara dıalog týdyrady. «Alataýdyń kóńildi keshi» jáne «Aıly tún» atty jumystarynda jaryq pen kóleńkeniń qozǵalysy, keńistik aıasyndaǵy shashyraı tógilgen túster gammasy san qubylyp, tamyljyǵan áýen baıaý taralyp, beınebir aýaǵa sińip ketkendeı. Tolysqan aıdyń kól betindegi sáýleli ǵumyry, jaǵalaı bitken qalyń ormannyń qushaǵy, sý betinen kóterilgen tumannyń sıqyrly elesi – alǵashqy tańyrqaýdyń, tamsanýdyń shyǵarmashylyq dabyly ispetti.
–Bala kezimnen sýretke áýes edim. Qaraǵandyda týyp-óstim. Ǵumyr boıy sýretshilikpen aınalysyp kelemin. Kúni búginge deıin sýret salý, týdyrý, jańashyldyq, eksperıment jasaýdan jalyqqan emespin, – degen sýretshi kompozısııa men tústerdiń ózgerip otyrýyn realıstik beıneleý zańdylyqtaryna negizdelgenin aıtady.
Igor Bagramovtyń shyǵarmashylyǵynda ózi týyp-ósken, ornyqqan kenshiler qalasy men dalasynyń orny erek. Kómir ónerkásibimen qatar ózge de óndiristiń damýyna bastaý bolǵan qala tarıhy sýretshini beıjaı qaldyrǵan joq. Odan bólek ekinshi dúnıejúzilik soǵys taqyryby men jaýyngerlerdiń beınesin, ótpeli kezeńderdegi qoǵam men mádenıettiń damý kezeńderin keskindeı otyryp, bataldi janrǵa batyl kiristi. UOS batyrlary Mánshúk Mámetova men Álııa Moldaǵulova jáne Núrken Ábdirov trıptıhi halyq ómiri men maıdan kórinisterinen syr shertedi.
–Soǵysqa attanǵandardyń deni jastar edi. Tipti bala deýge bolady, olardyń kóbi qyrshyn ketti. Mysaly, Núrken Ábdirov nebári 23 jasta ǵana boldy. Kartınada beınelengen Álııa Moldaǵulova maıdan dalasynda hat oqyp otyr. Al onyń artynda qazaq eliniń aspany tur. Pýlemet qasyndaǵy Mánshúk Mámetova da solaı. Olardyń árqaısysynyń artynda eli men jurty, Otany, qazaq dalasy jatyr, – deıdi ol.
Qashanda jańashyldyqty jany súıetin Bagramovtyń «Otan» atty mozaıkalyq keskindemesi – oryndalý tehnıkasynyń qıyndyǵymen, qaıtalanbas ereksheligimen bir tóbe. Avtor altyn besik – týǵan jerge degen saǵynyshy men qurmetin osylaı bildirse kerek, bar tirshiliktiń bastaýyndaı birden kózge shalynatyn japanda qaraýytqan jalǵyz úı buıyǵy qalpynda tún qushaǵyna orana túsken. Sútteı jaryq aıdyń tógilgen nury «Jazataıym adasqan bolsań, men barmyn, jolaýshym. Maǵan qarap baǵytyńdy betke alarsyń» degendeı juldyzdarmen ıek qaǵa jymyńdaıdy.
