Ulttyq qundylyqtaryn jańǵyrtý, rýhy bıik ulttyq ıdeıanyń qalyptasýyndaǵy ulttyq qundylyqtardyń mańyzyn kórsetý, san ǵasyrlar boıy suryptalǵan ulttyq qundylyqtarymyzdy dáripteý, qazaq halqy týdyrǵan moraldyq normalarda jáne ulttyq qundylyqtarda bekitilgen patrıottyq tájirıbeni meńgerý, ulttyq etnomádenı dástúrler men ádet-ǵuryptardy taný baǵytyndaǵy taqyryptar qozǵalǵan konferensııada jekelegen zertteý taqyryptary boıynsha arnaıy baıandamalar jasalatyndyǵynan habardar etken «El-shejire» qoǵamdyq qorynyń prezıdenti Dáýlet Áshimhan osy baǵytta qor tarapynan júzege asqan tarıhı-mádenı mańyzy bar sharalar barysyna toqtalyp, jas urpaq sanasynda ulttyq qundylyqtardyń ornyǵýy men ary qaraıǵy nasıhat jumystarynyń retine toqtalyp ótti.
Sharanyń moderatory Sh.Ýálıhanov atyndaǵy Tarıh jáne etnologııa ınstıtýtynyń jetekshi ǵylymı qyzmetkeri, tarıh ǵylymdarynyń kandıdaty F.Shamshıdınova ár taqyryptyń mańyzdylyǵyna toqtalyp, ǵylymı negizdi, tereń taldaýlarmen jazylǵandyǵyna kópshiliktiń nazaryn aýdardy.
Táýelsizdiktiń alǵashqy jyldarynan bergi aralyqta ulttyq qundylyqtardyń mańyzyna oraı tereń taldamaly maqalalaryn arnap júrgen pýblısıst, «Aqıqat» qoǵamdyq-saıası jýrnalynyń Bas redaktory A.Álim búgingi ǵadamdastyrý kezeńindegi memleketterdiń sıpatyn tereńnen taldap berse, óz sózin «Armysyzdar, aǵaıyndar!» dep bastaǵan ál-Farabı atyndaǵy QazUÝ fılosofııa kafedrasynyń aǵa oqytýshysy, fılosofııa ǵylymdarynyń kandıdaty Á.Bákiruly osy sóz tirkesiniń qazaqy ǵuryptaǵy orny men mańyzyna, ulttyq mádenıetti jańǵyrtýǵa baǵyttalǵan memlekettik baǵdarlamalarǵa toqtalyp ótti.
Alqaly jıyn QazUAÝ «Rýhanı jańǵyrý» gýmanıtarlyq zertteýler ortalyǵynyń jetekshisi, Tarıh materıaldaryn zertteý jónindegi respýblıkalyq aqparattyq ortalyqtyń dırektory, IýNESKO «Ǵylym jáne rýhanııat» kafedrasynyń meńgerýshisi, QR UǴA korrespondent múshesi, tarıh ǵylymdarynyń doktory, professor M. Ábýseıitova, «Azamat áleýeti» Jeke Qaıyrymdylyq Qorynyń Prezıdenti, fılologııa ǵylymdarynyń kandıdaty A.Ceısenovanyń baıandamalarymen jalǵasyn tapty.
Konferensııaǵa qatysqan zııaly qaýym ókilderi, tarıh jáne etnografııa salasynyń mamandary, qala kolledjderiniń stýdentteri men úkimettik emes uıymdar músheleri baıandamashylarǵa suraqtar qoıyp, óz oılarymen bólisti.
Konferensııany qorytyndylaı kele «Uly dalanyń jeti qyry» maqalasy aıasynda halqymyzdyń tarıhyn zertteýge, jańa qyrynan tanytýǵa, jastardy otansúıgishtikke tárbıeleýge jáne t.b. baǵyttalǵan usynystar qabyldandy.
Shara aıasynda Ulttyq kitaphana mamandarynyń uıymdastyrýymen «Uly dalanyń jeti qyry» taqyrybynda kórme kópshilik nazaryna usynyldy.
