Atalǵan basqarma basshysynyń orynbasary Shyńǵyshan Saýranbaevtyń aıtýynsha, bıznes salasyna jańa qadam basqan áıelderge qoldaý kórsetý maqsatynda uıymdastyrylǵan jármeńke tyń bastamalardy yntalandyrýǵa múmkindik beredi. Aǵymdaǵy jyly áıelderdiń 40 paıyzy «Bıznestiń jol kartasy – 2020», «Eńbek», «Jibek joly» memlekettik jáne aımaqtyq baǵdarlamalaryna qatysqan. Búginde elimizdegi shaǵyn jáne orta bıznestiń 41,5 paıyzy áıelderdiń enshisinde bolsa, onyń basym bóligi ońtústik astanaǵa tıesili. Al aǵymdaǵy jyly qala ákimimen bekitilgen «Isker ana» aımaqtyq baǵdarlamasy óz kásibin ashqysy keletin áıelderdi kásipkerliktiń álippesine baýlyp, bıznesti uıymdastyrýdyń tájirıbesin meńgerýge múmkindik beredi. Sondaı-aq aǵymdaǵy jyly berilgen 94 granttyń 32-sin qala boıynsha kásipkerlik salasynda júrgen názik jandylar enshilegen.
Bıylǵy jyly onynshy ret ótip otyrǵan «Qanatty áıel» ıgi sharasy barysynda turmysy tómen nemese kásibin endi bastaǵan kásipkerler men ulttyq dástúrdi dáripteı bilgen, sondaı-aq jańa tehnologııalardy paıdalanǵan jobalarǵa erekshe kóńil bólindi. Jármeńkede naryqta bolmaǵan kádege jarar tyń buıymdar, mysaly kilemderge arnalǵan qap, salaýatty ómir saltyna arnalǵan taǵam túrleri, t.b. kópshilik nazaryna usynyldy.
Jańa bastamalar jármeńkesine qatysqan otyzǵa jýyq orta jáne shaǵyn bıznes ókilderi «Tabysty startap», «Áleýmettik-jaýapty bıznes» jáne «О́z isine adaldyq» atalymdary boıynsha marapattaldy. Mysaly, qant dıabetimen aýyratyndarǵa arnalǵan, densaýlyqqa zııansyz balkúlsheler «Tabysty startap» atalymyn jeńip aldy.
