«Balaýsa» atty balabaqsha 100 orynǵa laıyqtalǵan. Bul mekemeniń bir ereksheligi sol, ol keshke, sondaı-aq demalys jáne mereke kúnderi jumys isteıdi. Atalǵan balabaqshanyń quryltaıshysy Baǵdat Bekejanovanyń aıtýynsha, jańadan ashylǵan mekeme 30 adamǵa jumys taýyp bergen.
– Jobanyń jalpy quny 30 mıllıon teńge boldy. Onyń 5 mıllıon teńgesi ózimniń qaltamnan shyqty da, qalǵanyn «Damý» qorynan nesıe túrinde aldym, deıdi ol.
Al «Dárııa» balabaqshasyn quryltaıshy Ásem Ormanalıeva 30 mıllıon teńge bolatyn óz qarajatyna salypty. Mektepke deıingi mekeme 60 orynǵa eseptelgen. Balabaqsha ıesi Ásem Ormanalıeva baldyrǵandardy damytýdy el damýynyń mańyzdy sharttarynyń biri jáne ol jarqyn bolashaqtyń kepili dep sanaıdy.
– Balalardy mektepke deıingi bilimmen qamtamasyz etý – bizdiń «Dárııa» balabaqshasynyń basty maqsaty, – dedi ol jańa nysannyń ashylý saltanatynda.
Qaraǵandy oblysy
