Kelgen qonaqtar 28 panfılovshy batyrlar saıabaǵyndaǵy «Máńgilik alaýǵa» gúl shoqtaryn qoıyp, qaharmandar rýhyna taǵzym etti. Odan soń Áýlıe-Voznesenskıı kafedraldyq shirkeýine bardy. Izin ala delegasııa ókilderi Almatydaǵy ındýstrıaldy aımaqqa attandy. Onda kartrıdj shyǵaratyn otandyq zaýyttyń jumysymen tanysty. Al tústen keıin sheteldik meımandar Almatydaǵy ulttyq kitaphanaǵa 10-nan astam soǵys jyldaryndaǵy, qazaqstandyqtardyń ereń eńbegin sıpattaıtyn týyndylardy tabystady.
«Delegasııa quramynda iskerlik qaýymdastyq ókilderi, qalanyń basshylyq quramy, mádenıet ókilderi bar. Biz issapar aıasynda qala basshysymen kezdesip, bolashaqqa jospar quryp, keıbir máselelerdi talqylaýǵa keldik. Erteń de bilim berý salasy, mádenıet, qurylys, ónerkásipti damytý, ınvestısııa tartý sekildi máselelerdi qaraý kúndik josparda tur. Birqatar kelissózderge de qol qoıamyz», dedi Sankt-Peterbýrg qalasy Syrtqy baılanys komıteti tóraǵasynyń orynbasary Andreı Hlýtkov.
Aıta keteıik, qonaqtar erteń de bilim oshaqtaryna, Ábilhan Qasteev atyndaǵy óner murajaıy men Yqylas atyndaǵy halyq aspaptar mýzeıine barady.
