Qurlyq áskerleri Áskerı ınstıtýty Baspasóz qyzmetinen habarlaǵanyndaı, dástúrli túrde ótetin áskerı jekpe-jekke 200-ge taıaý jaýynger qatysqan. Qurlyq áskerleri Áskerı ınstıtýtynyń dene shynyqtyrý kafedrasynyń bastyǵy, polkovnık Baýyrjan Mırovtyń aıtýynsha, qoıan-qoltyq urysy tek sport júzinde ǵana emes, ómirde de kerek nárse. О́ıtkeni, ózińdi qorǵaý kezinde, bizdiń jaýyngerlik ómirde de sport árqashan qajet. Sport boıǵa densaýlyq, kúsh pen jiger syılap qana qoımaıdy. Sonymen qatar jeńiske degen qushtarlyqty oıatady, namysty qaıraıdy.
Osy jarysta boıdaǵy jaýyngerlik rýh pen tasyp turǵan kúsh-jiger arqyly shapshań qımylmen qarsylasyńa soqqy berip, utymdy ádis, shalt qımyldar nátıjesinde joǵary upaı jınap, jeńis tuǵyryna jetý – áskerı sportshylardyń basty maqsaty boldy.
Jarys qorytyndysy boıynsha ınstıtýttyń birinshiligine ótken qoıan-qoltyq saıysy urysynda áskerı qyz-kelinshekterdiń arasynda 1-oryndy ınstıtýttyń materıaldyq-tehnıkalyq basqarmasynyń is júrgizýshisi, qatardaǵy jaýynger Aıjan Kenjebaı jeńip aldy. Al kýrsanttar arasynda 55 keli salmaqta I oryndy 4-kýrs kýrsanty Jasulan Orazbek jeńip aldy; 60 keli salmaqta I oryn 1-kýrs kýrsanty Ernat Smaǵulovqa berildi; 65 keli salmaqta I oryndy 4-kýrs kýrsanty Ashat Abdýlla jeńip aldy; 70 keli salmaqta I oryndy 2-kýrs kýrsanty Nurbaqyt Ábilhan; 75 keli salmaqta I oryndy 2-kýrs kýrsanty Aıbek Serikbaev jeńip aldy. Al 80 keli salmaqta 4-kýrs kýrsanty Bekjan Jumahan jeńiske ıe bolsa, 85 keli salmaqta jeńisti 4-kýrs kýrsanty Nurasyl Nuranov qanjyǵasyna baılady.
Barlyq jeńimpazdar kýbok jáne maqtaý qaǵazdarymen marapattldy.
ALMATY
