Memlekettiń bilim mınıstri Lorenso Fıoramontı mektep oqýshylary 2020 qyrkúıekten bastap qorshaǵan ortanyń lastanýy, klımattyq ózgeris, jahandyq jylý sııaqty taqyryptardy jalpy pándermen qatar oqıdy. Jańa baǵdarlamaǵa saı, bul taqyryptar 33 saǵatqa josparlanǵan. Mınıstrlik ókili Vınchenso Kramarossa bul ıdeıanyń negizgi maqsaty keleshek urpaqty klımattyq ózgerýdiń jańalyqtary men tosynqubylystaryna osy bastan daıyndaý, aqparat berý, deıdi. Jańa pánmen qosa geografııa, matematıka, fızıka sııaqty jalpy pánderdiń baǵdarlamasyna da klımattyq ózgeris týraly aqparattar qosylmaq.
Sonymen qatar mınıstrlik ókilderi vedomstvoda jaqyn arada túbegeıli ózgerister bolatynyn habarlady. Vınchenso Kramarossanyń aıtýynsha, jańa ulttyq baǵdarlamany ázirleýge Kolýmbııa ýnıversıtetiniń turaqty damý ortalyǵynyń basshysy Djeffrı Saks, amerıkalyq ekonomıst, fılosof Djeremı Rıfkın sııaqty klımattyq ózgeris taqyrybymen aınalysatyn sarapshylar shaqyrtylǵan. «Bul jobaǵa atalǵan salany zerttep júrgen azamattardy tarttyq. Olar – bul taqyrypty tereńnen zerttep júrgen shyn janashyrlar. Osylaısha Italııa qorshaǵan ortanyń ózgerýi týraly sabaqty mektep baǵdarlamasyna engizgen álemdegi alǵashqy el bolady», dedi ol.
Qorshaǵan ortanyń lastanýy – álemdi tolǵandyrǵan negizgi máselelerdiń biri. Alaıda Italııa úkimetiniń mektep oqýshylaryna bul taqyrypty túsindirýi jaqynda ǵana BUU-nyń klımattyq ózgerister taqyrybyna arnalǵan otyrysynda sóz sóılegen 16 jastaǵy ekobelsendi Greta Týnbergpen baılanysty bolýy múmkin. Ol kishkentaı kezinen óz elinde, ıaǵnı Shvesııada narazylyq aksııalaryna qatysyp, óz zamandastaryn tabıǵatty qorǵaýǵa shaqyrady. Bıyl qyrkúıekte BUU-nyń Nıý-Iorkte ótken sammıtine qatysyp álemdik kóshbasshylardy klımattyq ózgeristerdi qolǵa alýǵa, túzetýge tyryspaıtynyn aıyptap, olardyń keler urpaqqa, bolashaqqa satqyndyq jasaǵanyn aıtqan edi.
