«Donorlyq ... О́mir saqtaý» atty aksııaǵa qatysý úshin uıym qyzmetkerleri bas qaladaǵy Qan ortalyǵyna tań bozynan jınaldy. 22 jastaǵy Aıbek Erboluly úsh jyldan beri óz erkimen qan tapsyryp keledi. Buǵan onyń qan qysymynyń joǵary bolýy sebep bolǵan. «Qan qysymym joǵary bolyp, túrli dári-dármekterdi ishtim. Tanystarym qan tapsyrýǵa keńes berdi. Eń alǵash 19 jasymda donor boldym. Qazir qan qysymym turaqty. Dári ishýdi de toqtattym. Búgin qyzmettesterimmen birge qan tapsyryp jatqanyma óte qýanyshtymyn», deıdi ol.
Kerisinshe, Kamıla Bekpenbetova qan tapsyrý týraly durys túsinikte bolmaǵan. «Qan tapsyrý óte aýyr bolady dep qorqatynmyn. Biraq búgin bári jeńil ótti. Donor bolýdyń qanshalyqty saýapty is ekenin, densaýlyqqa paıdasyn uqtym. Endi aınalamdaǵylardyń bárine nasıhattaýǵa daıynmyn», deıdi ol.
Jyl saıyn elimizde 200 myńdaı adam qan tapsyrsa, onyń 78 paıyzyn erikti donorlar quraıdy. Elordada jylyna shamamen 15 myń adam qan qajet etse, 40 myńǵa jýyq kisi kelip qan tapsyrady eken. Al olardyń 90 paıyzy qanyn tegin beredi. Mamandar aqyly donorlardyń kópshiligi sırek kezdesetin qan tobyndaǵylar ekenin aıtady.
«Biz osy aksııany uıymdastyrǵan «Qazaqstan qurylysshylar odaǵyna» sheksiz alǵysymyzdy aıtamyz. Bul ujymnyń bastamasy kópke ónege», dedi qýanyshymen bólisken Transfýzıologııa ǵylymı-óndiristik ortalyǵynyń meıirbıkesi Damelııa Sulýbekova.
Aksııa sońynda qatysýshylar «Stroıklass» qurylys kompanııasyna qaıyrymdylyq estafetasyn joldady. «Qazaqstan qurylysshylar odaǵy» RZTB tóraǵasynyń birinshi orynbasary Aıajan О́teýova bul aksııanyń qurylys qyzmetkerleri tarapynan qoldaý taýyp, estafetanyń sátti jalǵasatynyna senimdi ekenin aıtty.
