Áleýmettiń qamy – ádilettiń joly

Oblys ortalyǵynda jáne Kóksý aýdanynda tur­ǵyn­darmen kezdesip, áleýmettik ny­sandardy aralaǵan Úkimet bas­shysynyń orynbasary Ber­dibek Sapar­baevqa jurtshylyq tarapynan tolǵaqty máseleler aıty­lyp, alańdatqan suraqtar qo­ıyl­dy. Máselen, óńir turǵyn­daryn ataýly áleýmettik kó­mekti taǵaıyndaýdyń jańa jú­ıesi, mindetti medısınalyq saq­tandyrý jarnasy, dári-dár­mekpen qamtylýy, qoǵamdyq tártip, bilim berý men den­saýlyq saqtaý salasyndaǵy jetistikter men sheshimin tabatyn máseleler tolǵandyrady eken. Vıse-pre­mer aıtylǵan jaılarǵa oraı túsinik berip, osy oraıda atqa­ry­lyp jatqan birqatar sharany atap ótti.

– Memleket halyq aldynda­ǵy mindetterin tolyǵymen oryndap keledi. Jalaqy, jár­demaqy, shákirtaqy, zeınetaqy ýaq­ty­ly tólenýde. Halyqtyń da­mý kórsetkishi 4 paıyzǵa ósip otyr. Jyldan-jylǵa áleý­met­tik salaǵa bólinetin qarjy kólemi de artýda. Kóp balaly otbasyna qoldaý kórsetip, ataýly áleýmettik kómek berý maqsatynda 257 mlrd teńge qarjy bólindi. Nesıelerdiń aıyppuldaryn óteý úshin de 147 mlrd teńge qarastyryldy. Zaman talabyna saı maman daıar­laý da ózekti másele. Bizde 132 joǵary oqý orny bar. Bul 18 mıllıon turǵyny bar halyq úshin óte kóp. Sondyqtan da sa­pasyz bilim beretin birqatar jo­ǵary oqý ornyn jabý ja­ıyn qarastyryp jatyrmyz. Al densaýlyq saqtaý salasyna ke­ler bolsaq, medısınany da­my­tý boıynsha memlekettik baǵ­darlama daıyndadyq. Osy­ǵan oraı árbir eldi mekende medısınalyq bólimshe bolý kerek. Búgingi tańda 5000 dári­ger jetispeıdi. Osy syndy má­se­lelerdi tolyǵymen sheship, 5 jylda barlyq eldi mekendi dárigerlermen qamtamasyz et­pekpiz. Halyqtyń ortasha ómir súrý uzaqtyǵyn 2025 jylǵa deıin 75 jasqa jetkizý de nysa­naly isimizdiń bir parasy. Son­daı-aq turǵyndardy sapaly, ba­ǵasy tómen dári-dármekpen qamtý da ózekti másele. Osy oraı­da barlyq dárihanadaǵy dárilerdiń quny birdeı bolýyn jáne baǵanyń negizsiz óspeýin qamtamasyz etpekpiz. Tártip buzýshylyq, jastardyń óz ózine qol salýy syndy óreskel isterdiń oryn almaýy úshin ár qalada Taldyqorǵandaǵydaı sport keshenderi bolýy kerek. Bul turǵyda mekteptiń sport zaldaryn demalys kúni jalǵa berýge múmkindik jasalýda. Ol arqyly mektep ózine qarjy tapsa, kópshilik sportpen aınalysyp, densaýlyǵyn nyǵaıtýǵa múmkindik alady. Munan bólek, halyqty eńbekpen qamtamasyz etýde jumyspen qamtý ortalyqtaryna jańasha talap qoıylýda. Endigi rette ortalyq mamandary bos jumys oryndaryn kútip otyra bermeı, iri kásiporyn, kásip ıelerimen tyǵyz qarym-qatynasta jumys istep, bos jumys oryndaryn anyqtaıtyn bolady, – dedi jurshylyqpen kezdesý barysynda Berdibek Saparbaev.

Sapar aıasynda Úkimet basshysynyń orynbasary Tal­dyqorǵan qalasynda turatyn kóp balaly Qalabaevtar otba­syna bas suǵyp, áýlettiń jaǵ­daıymen tanysty. О́ńirdegi kóp balaly analarǵa jasalyp otyrǵan qamqorlyq ja­ıyna toq­talǵan oblys ákimi Aman­dyq Batalov qonaqtardy qala ma­ńynda salynyp, qolda­nysqa berilip jatqan kottedj qalashyǵyn da aralap kórý­ge shaqyrdy. Qazir munda áleý­met­tik baǵdarlama boıynsha jeńildikke ıe bolǵan 100 otbasy qonystanǵan.

Sonymen qatar Úkimet delegasııasy Taldyqorǵandaǵy Jastar ortalyǵynda, №27 jalpy bilim beretin mektepte, kópsalalyq aýrýhanada bel­­sendi jastar men bilim berý, densaýlyq saqtaý salasy qyz­­met­kerlerimen kezdesti. Al Kók­sý aýdanyna jasaǵan sa­parynda aýmaqtaǵy qant óndi­risiniń damýyna úles qosyp otyrǵan «Kóksý» qant zaýytynyń óndirisin kórip, Balpyq bı kenti men Mámbet aýylynyń tynys-tirshiligimen tanysty.

Almaty oblysy