Onyń aıtýynsha, «Nurly jer» memlekettik baǵdarlamasyn júzege asyrý turǵyn úı qurylysyna baǵyttalatyn ınvestısııalardyń jyl saıynǵy ósimin qamtamasyz etken baǵdarlamalardyń biri boldy. Qazir 2020-2025 jyldarǵa arnalǵan «Nurly jer» ázirlený ústinde, onda turǵyndardyń tabysy men olardyń turǵyn úı baǵdarlamasyna qatysýyna baza nazar aýdarylady.
«Eger birinshi baǵdarlama tek turǵyn úı qurylysyna ǵana qatysty bolsa, ekinshi baǵdarlamanyń qamtıtyn máseleleri kóp. Onyń ishinde jylýmen jáne sýmen jabdyqtaý, kommýnaldyq sektordy jańǵyrtý, turǵyn úılerdi jóndeý jáne óńirlerdi damytý bar», — dedi Q. О́skenbaev.
Turǵyn úıdiń qoljetimdiligi satysy engiziledi, turǵyndar tabysy aıqyndaýshy faktor bolady.
«Biz ishinde qaıta baǵdarlaý jasadyq. Kezek adamdardyń tabysyna baılanysty jasalatyn bolady. Biz tabystary boıynsha shekteýdi uıǵardyq, birinshi satyǵa tabysy bir eń tómengi kúnkóris deńgeıine deıingi (2019 j. – 29 700 teńge) otbasylar jatady — olar úshin biz satyp alý quqyǵynsyz jalǵa beriletin turǵyn úı salýymyz kerek. Tabysy eki eń tómengi kórsetkish deńgeıine deıin (2019 j. – 59 400 teńge) bolatyn ekinshi sanattaǵy otbasylar úshin biz jyldyǵy 2% bolatyn jeńildikti nesıe qarastyrýymyz kerek. Úshinshi sanatta –tabysy úsh eń tómengi kúnkóris deńgeıine deıingi (2019 j. — 92 000 teńge) azamattar – olar úshin biz jyldyǵy 5% tetikti usynamyz. Al tabysy budan joǵary azamattar 7-20-25 baǵdarlamasyna qatysa alady nemese ekinshi deńgeıli bankter arqyly turǵyn úı alýǵa úmitker bola alady», — dep túsindirdi Q. О́skenbaev.
Onyń aıtýynsha, mysaly «Baqytty otbasy» jeńildikti baǵdarlamasynda endi shekteý bolmaıdy, barlyq sanattaǵy azamattar qatysa alady, olar tabystary boıynsha bólinedi.
«Baǵdarlamanyń birinshi kezeńine tek turǵyndardyń úsh sanaty ǵana qatysa alatyn. Olar – kóp balaly analar, tolyq emes otbasylar jáne múgedek balalardy tárbıelep otyrǵan otbasylar. Qazir jańa baǵdarlamada eshqandaı shekteý joq, kezekte turǵyndardyń bári qatysa alady, tek ishinde biz tabystary boıynsha bóletin bolamyz», — dedi ındýstrııa jáne ınfraqurylymdyq damý birinshi vıse-mınıstri.
Sonymen qatar Q. О́skenbaev turǵyndardyń ómirlik jaǵdaılaryna baılanysty satyp alatyn turǵyn úıiniń sanatyn qaıta ózgertý máselesi qarastyrylyp jatqanyn aıtty.
«Jalǵa berilgen turǵyn úıdi mysaly, eger adam jalǵa alsa jáne bir ýaqytta TQJB-de qarajat jınaqtaǵan bolsa, nesıege beriletin turǵyn úı sanatyna aýystyrýǵa bolady. Sondaı-aq kerisinshe jaǵdaı da týyndaýy múmkin, mysaly, otbasy músheleriniń biri jumyssyz qalsa jáne nesıe tóleýge múmkindigi bolmasa, onda bul tetik esepshotta jınalǵan qarajatyn saqtaýdy, biraq turǵyn úıdi otbasynyń jaǵdaıy jaqsarǵansha jalǵa beriletin turǵyn úı sanatyna aýystyrýdy qarastyrady. Basqasha aıtqanda, biz ómirde túrli jaǵdaılarǵa tap bolýy múmkin adamdar úshin barynsha jaǵdaı jasaımyz», — dep qosty Q. О́skenbaev.
Aıta keteıik, «Nurly jer» baǵdarlamasy aıasynda 2018 jyly 12,5 mln sh.m. nemese elimizdiń bir turǵynyna 0,68 sh.m. turǵyn úı paıdalanýǵa berildi, bul TMD elderiniń arasyndaǵy eń joǵarǵy kórsetkish. Bıyl 13 mln sh.m. turǵyn úıdi paıdalanýǵa berý josparlanǵan.
