Baıraqty básekede Qazaqstannyń týy astynda Aleksandr Býblık, Mıhaıl Kýkýshkın, Aleksandr Nedovesov jáne Andreı Golýbev óner kórsetedi. Alǵashqy ekeýi álemdik reıtıngte 57 jáne 67 oryndardy ıelenýde. Bul – jerlesterimizdiń arasyndaǵy ázirge eń úzdik kórsetkish. Sol sebepti Býblık pen Kýkýshkın jekelegen saıystarda kúsh synasady. Al Nedovesov pen Golýbev juptyq básekede sheberlik baıqasady. Sondaı-aq, Pıreneı túbegine sapar shegetinder qatarynda qosalqy quramdaǵy Dmıtrıı Popko bar. Bul kúnderi ol ATR reıtınginde 187 satyǵa jaıǵasty.
Esterińizge sala keteıik, bıylǵy jyldan bastap Devıs kýbogy jańa formatta ótedi. Alty topqa bólingen 18 komandanyń arasynan úzdik shyqqan segizi shırek fınalǵa joldama alady.
Madrıdte Qazaqstannyń tennısshileri Gollandııa men Ulybrıtanııa quramalaryna qarsy oınaıdy. Tusaýkeser kezdesýdi jerlesterimiz erteń Nur-Sultan ýaqyty boıynsha saǵat 16:00-de Qyzǵaldaqtar eli ókilderine qarsy ótkizedi.
