Fılm Qazaqstan Respýblıkasy áskerı qyzmetshileriniń tájik-aýǵan shekarasynda bitimgerlik maqsatta qyzmet atqarý barysynda, 1995 jyly kóktemde bastarynan ótkergen shynaıy oqıǵany baıandaıdy. 7 sáýir kúni Pshıharv shatqalynda Qazaqstan Ishki áskeriniń jetinshi qurama rotasy sodyrlardyń tutqıyldan jasaǵan shabýylynan ot pen oqtyń qursaýyna túsip qalady. Jaýdyń kúshi basym bolǵan urysta 17 áskerı qyzmetshi oqqa ushyp, 33-i jaralanǵan edi. Aýǵan jaǵynan shabýyl jasaǵan sodyrlar bir saǵattyń ishinde Tájikstan aýmaǵyna ótip ketýdi josparlaǵan bolatyn. Alaıda, qazaqstandyq jaýyngerler joıqyn toıtarys berip, bes saǵattyq qarýly qaqtyǵystan keıin shabýylshylar keri sheginýge májbúr boldy.
Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń Jarlyǵymen 17 sarbazdyń beseýine II dárejeli «Aıbyn» ordeni, on ekisine «Jaýyngerlik erligi úshin» medali qaza bolǵan soń berildi. Sondaı-aq batyr bozdaqtyń bárine Reseı tarapynan da «Za otlıchıe v slýjbe» medali qaza bolǵan soń berildi.
Tájik halqyna kórsetken kómegi úshin qazaqstandyq jaýyngerlerge qurmet retinde Dýshanbede monýment turǵyzyldy. Elimizdiń astanasy Nur-Sultan qalasynda «Otan-Ana» monýmenti janynan Ishki áskerdiń 17 sarbazyna arnalǵan alleıa ashylyp, eskertkish baǵana ornatylǵan, sonymen qatar, Shymkent, Petropavl jáne basqa qalalarda batyrlarǵa eskertkishter qoıylǵan.
Fılmniń ıdeıasyn usynǵan – Qazaqstan Respýblıkasy Ulttyq ulanynyń Bas qolbasshysy, general-leıtenant Rýslan Jaqsylykov, bas prodıýseri – Danııar Ibragımov, qoıýshy rejısseri – Asqar Uzabaev, qoıýshy bas operatory – Maksım Zadarnovskıı.
Fılmdi «AIý SINEMA» kınokompanııasy Qazaqstan Respýblıkasy Ishki ister mınıstrligi men Ulttyq ulannyń qoldaýymen túsirgen.
Fılmde tanymal, talantty akterler – Dáýren Serǵazın jáne Rınat Doshıbekov, jas akterler – Halyq Rahat, Dııas Myrzahmet, Sharıfbek Zakırov jáne Indıra Shynbolatqyzy oınaıdy.
Kórkem fılm 21 qarashadan bastap elimizdiń barlyq kınoteatrlarynda kórsetile bastaıdy.
