Qoǵam úshin qajettiligi zor osynaý mindetti ornyqty oryndaý maqsatynda Bilim jáne ǵylym mınıstrligi «Qarjy ortalyǵy» AQ-men birlesip, memlekettik tapsyrysty ornalastyrý rettiligin ázirlep shyqty. Onda mańyzdy iske jeke sektordyń keńinen qatysý sharttary men tetikteri jan-jaqty júıeli negizde qarastyrylǵan.
Osyǵan oraı, búginde ınvestorlar men jeke kásipkerlerdiń ózara tıimdi sharttar arqyly stýdenttik jataqhanalar qurylysyn salýǵa at salysý múmkindigi meılinshe mol. Osy turǵyda olardyń bul úderiske aýqymdy túrde, naqtylaı tússek, tek áleýmettik nysan salý retinde emes, tabysty, turaqty jáne keleshegi kemel bıznes-joba retinde nazar salǵandary jón. Eń bastysy, muny is júzine asyrýdyń qolaıly alǵysharttary bar.
Usynystyń qashanda suranystan bastaý alatyny barshaǵa málim jaıt. Máselen, búgingi tańda el aýmaǵynda stýdentter úshin 75 myń oryn-jaıdy qoldanysqa engizý qajettiligi týyndap otyr. Onyń ishine elimizdiń iri qalalarynan bastap, oblystyq mańyzy bar qalalardy qamtıtyn barlyq óńirler kiredi.
Endi, stýdentter jataqhanasy qurylysyna memleket qarjysyn salý máselesine qaıyra oralyp, sharttylyqtardy taldaýǵa talpynys jasap kórsek. Ilkimdi iske bilek sybana kirisken ınvestor nemese jeke kásipker nysandy (jataqhanany) stýdentter ıgiligine paıdalanýǵa bergennen keıin memleket tarapynan 8 jyl boıy úzdiksiz negizde memlekettik tapsyrysty ornalastyrý jolymen aqsha tólemderi júrgiziletin bolady. Osy oraıda, tólemderdiń mólsheri paıdalanýǵa engizilgen jáne bilim alýshy naqty ornalasqan oryn-jaılar sanyna baılanysty bolatynyn eskerte ketken abzal. Jyl saıyn ár oryn-jaı úshin jańadan jataqhana salynǵan jaǵdaıda – 122 AEK, ǵımaratty jataqhana retinde rekonstrýksııalaý jasalǵan jaǵdaıda 47 AEK kóleminde qarjy tólenedi.
Bul bastama budan da bólek tabys kózi bolý múmkindigimen tıimdi. О́ıtkeni, stýdentter tóleıtin aı saıynǵy turý aqysy memleket tapsyrysynyń qunyna kirmeıdi. Onyń mólsherin jataqhananyń menshik ıesi derbes retteıdi jáne ol naqty óńirdegi turǵyn úı naryǵynyń shynaıy sharttaryna sáıkes anyqtalady.
Sonymen birge qurylysty salýshy nemese ǵımaratqa rekonstrýksııa jasaýshy tarap (menshik ıesi) turmystyq qyzmetter kórsetý maqsatynda kommersııalyq alańdar jasaqtaýǵa quqyly. Olardyń negizgi tutynýshylary, árıne, jataqhana turǵyndary bolary kúmánsiz.
Jobaǵa qatysýdyń birshama sharttary bar, onyń bastysy – qolǵa alǵan isti ilgeri bastyrý úshin bastapqy kapıtal men jer teliminiń bolýy. Jer telimi bolmaǵan jaǵdaıda biz ony memleket-jekemenshik áriptestik tetigi arqyly, óńirlerdiń áleýmettik kásipkerlik korporasııalarymen birge jobaǵa bastamashy bolý nemese konsorsıým qurý jolymen resýrstardy biriktirý arqyly alýdyń birqatar tıimdi joldaryn usynamyz.
Sonymen qatar, eger belgili bir tulǵa ǵımarattyń menshik ıesi bolsa, ony jataqhanaǵa beıimdep rekonstrýksııa jasaý jáne oǵan memlekettik tapsyrysty ornalastyrý maqsatynda tartynbaı talaptanýǵa bolady.
Jobany is júzinde júzege asyrý jumystary qolǵa alynǵannan beri joǵaryda atalǵan mazmundaǵy 38 aldyn ala shart jasaldy, sonyń nátıjesinde 11 myńnan astam jańa oryn-jaı qoldanysqa tapsyrylyp, stýdentter ıgiligine aınalmaq.
Máselen, bıylǵy qarasha aıyndaǵy jaǵdaı boıynsha 2 287 oryndy qamtıtyn 11 nysandy paıdalanýǵa berý qamtamasyz etildi (Shymkent qalasy: JK «Kaıpova» – 350, «Ońtústik Qazaqstan medısına akademııasy» AQ – 250; Almaty qalasy: Qazaqstan ınjenerlik-tehnologııalyq ýnıversıteti – 188, Q.Sátbaev atyndaǵy Qazaq ulttyq tehnıkalyq ýnıversıteti – 260; Aqtaý qalasy: JK «Gýseınov» – 180, Sh.Esenov atyndaǵy Kaspıı memlekettik tehnologııa jáne ınjınırıng ýnıversıteti – 170; Qaraǵandy qalasy: JK «Ryspaeva» – 100; Semeı qalasy: «Qaınar» joǵary kolledji – 105, О́skemen qalasy: «Qazaqstan-Amerıkandyq erkin ýnıversıteti» JShS – 106; Pavlodar qalasy – «RnR Group» JShS – 178, Qyzylorda qalasy – «DıLMASh» JShS – 330 oryn).
Jobaǵa qyzyǵýshylyq tanytqan múddeli taraptarǵa qatysý sharttarymen tolyq tanysý úshin studdom.kz saıtyna kirý jáne 8-8000-802-828 nómiri arqyly BǴM Qarjy ortalyǵynyń koll-ortalyǵyna habarlasý qajet. Al odan keıingi qadam – shart jasasý úshin Qarjy ortalyǵyna ótinish berý kerek.
Biz, árıne, máýeli jemisin berer ekijaqty tıimdi áriptestikke qashan da múddelimiz.
«Qarjy ortalyǵy» AQ
