Jastar jylyna oraı jas muǵalimderge qoldaý kórsetý maqsatynda uıymdastyrylǵan is-sharanyń ashylý saltanatymen ınstıtýt dırektory Raısa Sadvakasova quttyqtap, aǵylshyn tili páni muǵalimderi úshin uıymdastyrylǵan trenıngter toptamasynyń mańyzdylyǵyn atap ótti. Sonymen qatar aǵylshyn tili baǵdarlamasy boıynsha О́ńirlik ofıs dırektory Djon Sılver, aǵylshyn tili baǵdarlamasynyń koordınatory Olga Paterova trenıngterdiń sátti ótýine izgi tilekterin bildirip, trenıngke qatysýshy muǵalimdermen arnaıy kezdesýge AQSh-tyń Almaty qalasyndaǵy Bas konsýly Erık Maıer keletindigin habarlady.
Sonymen, «Ustazdar úıinde» AQSh-tyń Memlekettik bilim departamentiniń aǵylshyn tili boıynsha «English Language Fellow» stıpendıattary, sheteldik on bes ádisker bes seksııa boıynsha 150-den astam qala muǵalimine trenıngterin bastap ketti. «English Language Fellow» baǵdarlamasynyń 50 jyldyǵyna sáıkes, sheteldik oqytýshylar sheberlik synybyn ótkizip, aǵylshyn tili ádistemesin oqytý barysyndaǵy eń joǵary nátıjege qol jetkizý erekshelikterimen jan-jaqty tanystyrdy. 8 saǵattyq trenıngten soń muǵalimder ınstıtýttyń májilis zalynda AQSh-tyń Almaty qalasyndaǵy Bas konsýly Erık Maıer myrzamen kezdesti. Bas konsýl osyndaı mańyzdy is-sharany uıymdastyrýǵa uıytqy bolǵan Almaty qalasy boıynsha «О́rleý» BAUO» AQ fılıaly basshylyǵyna alǵys bildirip, «English Language Fellow» baǵdarlamasynyń qysqasha tarıhyna toqtaldy.
Aǵylshyn mádenıetimen tanystyrý, aǵylshyn tilin álem halqyna úıretý maqsatyn kózdegen baǵdarlamanyń irgetasy 1969 jyly qalandy. Qazirgi tańda 200-den astam aǵylshyn tilin taratýshy maman aıtýly baǵdarlama aıasynda álemniń 80-nen astam elinde tabandylyqpen eńbek etýde. Elý jyldyǵyna oraı Almaty qalasynyń muǵalimderine Orta Azııa óńirindegi baǵdarlamanyń úzdik oqytýshylary sabaq ótkizip, óz tájirıbelerimen bólisti. Osyndaı baǵdarlama aıasynda ótkizilgen trenıngter toptamasynyń aǵylshyn tili páni muǵalimderiniń tájirıbesin shyńdap, sabaq ótý ádisterin baıytýǵa múmkindik jasaıtyndyǵyna Erık Maıer myrza senim bildirdi.
ALMATY
