ULAǴATTY USTAZDAR BEDELIN KО́TERDI

Bilim berý qyzmetkerleriniń Uıǵyr aýdandyq “Qamqor” kásiptik birlestigi Qazaqstan Respýblıkasynyń Prezıdenti N.Nazarbaevtyń “Jańa onjyldyq – Qazaqstannyń jańa ekonomıkalyq órleýi – jańa múmkindikteri” atty Joldaýyn asa qýanyshpen qarsy aldy. О́ıtkeni, Elbasynyń 2020 jylǵa deıingi damýdyń strategııalyq baǵdarlamasy kópshiliktiń kóńilinen shyǵyp otyr. Joldaýda ekonomıkalyq jáne áleýmettik máseleler naqtylanǵan. Sonymen qatar, “Balapan” baǵdarlamasyn júzege asyrýǵa qatysty naqty tapsyrmalar berilgen. Onda mektepke deıingi mekemeler máseleleri túgelimen sheshimin tabý kerek delingen. Bıylǵy jyldyń sáýir aıynan bastap, bıýdjet salasy qyzmetkerleriniń jalaqysy 25 paıyzǵa kóteriledi. Bul ulaǵatty ustazdar úshin úlken qýanysh. Alty alashtyń balasy qosylsa, eń qurmetti oryn ustazǵa tıetini sózsiz. “Adamǵa eń birinshi bilim emes, rýhanı tárbıe berilýi kerek, tárbıesiz berilgen bilim – adamzattyń qas jaýy, ol keleshekte onyń ómirine apat ákeledi”, – dep Ál-Farabı aıtqandaı, bolashaǵymyz­dyń bilimdar bolýy – ulttyq rýhanı tálim-tárbıe bere bilýimizde jatyr. Osy salada erinbeı eńbek etip kele jatqan ustazdardyń eren eńbekterin Elbasy elep-eskerip otyr. Táýelsiz eldiń tutqasy rýhanı tárbıeden bastaý alyp, bilimmen qarýlanǵan, densaýlyǵy myqty urpaqtyń qolynda bolsa, ol babalar armany oryndalǵany emes pe? Keleli keleshek úshin bilegin sybanǵan sanaly azamattardyń sarabdal isterin erteńgi urpaq saralaı jatar. Alaıda, osy tusta ketken kemshilikterimiz de joq emestigin jasyra almaımyz. “Aýrýyn jasyrǵan adam óledi” demekshi, Elbasy bilim salasyn qatty synǵa alǵany belgili. Endeshe, bilim sapasyn jaqsartatyn, árkim óz isin adal atqaryp, jaýapkershilikpen qaraıtyn bolsa, atalmysh máselelerdiń júgi jeńil bolmaq. “Ju­my­la kótergen – júk jeńil” dep beker aıtpaǵan ǵoı. Káribaı QOJAǴULOV, Uıǵyr aýdandyq máslıhatynyń depýtaty, “Qamqor” birlestiginiń tóraǵasy. Almaty oblysy.