Grýffalo – álemdegi eń súıikti qubyjyqtardyń biri. 1999 jyly jaryq kórgen kitap búginge deıin mıllıondaǵan oqyrmannyń júregin jaýlaǵan tańǵajaıyp týyndy. Kúlkili de qyzyqty tilmen jeńil baıandalatyn Djýlııa Donaldsonnyń Grýffalo ertegisin tanymal jýrnalıst, Oksford ýnıversıtetiniń túlegi Ǵalym Boqash qazaq tiline aýdarsa, kórkemdegen belgili ıllıýstrator Aksel Sheffler. Ertegi Stepe&World baspasynan 2 myń dana taralymmen jaryq kórip otyr.
– Ertegini óz balalarym sııaqty qazaqtyń barlyq balasy bilsin, kórsin degen maqsatpen usynyp otyrmyz. «Grýffalo» kitabynyń, onyń keıipkerleriniń qazaqsha sóılep jatqanyna óte qýanyshtymyn. Ertegi Ulybrıtanııada jáne basqa da elderde balalarǵa uıyqtar aldynda oqyp berýge arnalǵan eń úzdik kitap dep tanylǵan. О́z balam da osy kitapty áli kúnge deıin jalyqpastan san márte oqyp berýimdi suraıdy, – deıdi Stepe&World baspasynyń dırektory Raısa Saıranqyzy.
Ertegi oqıǵasy quıtaqandaı tyshqannyń oıdan shyǵarǵan qubyjyǵy Grýffalo arqyly ormandaǵy qaterli jaýyn qorqytýdan bastalady. Eń qyzyǵy, qubyjyqpen ormanda kezdesip qalyp, bar qyzyq sol tustan bastalady. Ulybrıtanııa halqy arasynda keńinen taraǵan bul kitap mıllıondaǵan danamen basylyp, qyryqtan astam tilge aýdarylǵan. Grýffalo jaıly túsirilgen mýltfılm «Oskar» hám BAFTA (British Academy film awards) syılyqtaryna usynylyp, teatr sahnasynan talaı jyldan beri túspeı keledi.
Qazaq tilindegi jańa fentezı-jobalardyń birden-bir basty jetkizýshisi sanalatyn «Steppe&World» baspasy 2017 jylydan beri jumys istep keledi. Qazirgi ýaqytta Garrı Potter kóp serııaly romanyn resmı ruqsatpen birinshi bolyp qazaq tiline aýdarý ústinde.
