*Shetel ázili
ShAITANNYŃ KО́KESI
Oǵan «Ket, shaıtan alǵyr, shaıtandaryńa ket!» — dedi.
Ol shaıtandarǵa keldi.
Shaıtandar araq-sharaptaryn iship, tamaqtaryn jep, sol kúngi istegen ázázil isterin áńgimelep, bir-birine maqtanyp otyrǵan-dy. Kelgen qonaqty dastarhanǵa shaqyrdy.
Bir shaıtan: — Eshqandaı jazyǵy joq bolsa da, kúıeýine áıelin myqtap sabattyrdym, — dedi.
— Jaradyń! — dep joldastary ony qoshtap qoıdy.
— Sodan keıin olar ajyrasty ma? —dep surady kelgen qonaq.
— Joq, — dedi shaıtan.
— Osyndaı da is bolǵany ma! — dep qonaq basyn shaıqady. — Bul degeniń qanaǵatsyz, aıaqtalmaǵan is qoı.
Shaıtandar endi oǵan rızashylyqpen nazar aýdara bastady.
— Men, dedi ekinshi shaıtan, — ákesi men balasyn janjaldastyrǵanym sondaı, endi ekeýi birin-biri kórgisi kelmeıdi.
— Jaradyń! — dep joldastary ony da qoshtap qoıdy.
— Tek bolǵany osy ma? — dep qonaq taǵy da aralasty.
— Tek qana osy, — dep shaıtan seskene moıyndaǵandaı boldy.
— Bul isiń is emes, bul — kózboıaýshylyq! — dep qonaq kúıip-pisti. — Búıtip is bite me, istegen soń ákesi — ne balasyn qýyp shyǵýy kerek edi, ne úıge turýǵa huqynan múldem aıyrýy kerek edi, al balasy ákesinen ósh alý úshin onyń jeńil máshınesiniń barlyq dóńgelekterin jaryp ketýi kerek edi.
— Bul oıyma kelmepti, — dep shaıtan keshirim ótingendeı jer shuqylap ketti. Bólmede qolaısyzdaý tynyshtyq ornady.
— Men bylaı istedim, — dep úshinshi shaıtan sózin senimsizdeý bastady, — bir bastyqty esh sebep-saldarsyz ornynan alǵyzdym.
— Odan keıin ne boldy? — dep qonaq aıaǵyn bilýge qumartty.
— Eshteńe de bolǵan joq.
—Bile bilseńder, men bundaı isti eshýaqytta aıaqsyz qaldyrmaımyn, — dedi qonaq. — Gazetke synatyp, týǵan qalasyn tastaı qashýǵa májbúr eter edim. Al sizdiń bastyǵyńyzdy eń bolmasa kásipodaq músheliginen de shyǵarǵan joq pa?
— Shyǵarǵan joq qoı deımin, — dedi shaıtan mińgirlep.
— Osyny da is tyndyrdym dep! — qonaq tas-talqan bop ashýlandy. — Sizderdiń tamuqtaryńda eshqandaı tártip degen joq eken.
Shaıtandar iship otyrǵan sharaptary men jep otyrǵan tamaqtaryn da umytty, tek bireýiniń ǵana batyly jetip:
— Keshirińiz, eger qupııa bolmasa, siz jer ústinde qandaı ispen shuǵyldanasyz? — dep surady.
— Shynynda da, meniń isteıtin isimniń qupııa ekeni ras, — dedi qonaq. — Biraq sizder nıettes inishekter bolǵandyqtan jasyrmaı aıtýǵa bolady, men — domalaq aryz jazýdyń sheberimin. Domalaq aryzdy qardaı boratam, kimniń kim ekenine qaramaımyn, taqyryp ta tańdamaımyn.
Shaıtandar oǵan zor iltıpat bildirip, masattana qarasty.
— Jaraıdy, men kettim, — dedi qonaq, — sizderden úlgi-ónege alatyndaı eshteńe joq eken. Meni sizderge bosqa jumsaǵan eken. Sóıtti de ol shyǵyp ketti. Shaıtandar ony keý-keýlep esikke deıin shyǵaryp salyp, tek qonaqtary tumandy qarańǵylyqqa súńgip, kózden ǵaıyp bolǵanda baryp bas shaıtan demin "Ýh" dep alyp:
— Mine, mynaýyń shaıtannyń kókesi ǵoı! — dedi daýysy qaltyrap, — ketkenine shúkirshilik etemin, áıtpese bizdiń ústimizden domalaq aryz jazady eken dep záre qutym qalmap edi…
G.Spasov.
