Alqaly basqosýǵa Qazaqstan halqy Assambleıasy Tóraǵasynyń orynbasary Janseıit Túımebaev, Parlament Senaty men Májilisiniń depýtattary, Halyqaralyq Túrki akademııasynyń prezıdenti Darhan Qydyráli, elimizdegi birqatar eldiń elshileri, ǵylymı mekemeler men bilim ordalarynyń basshylary, memleket jáne qoǵam qaıratkerleri, tanymal ǵalymdar men zııaly qaýym ókilderi qatysty. Alǵash bolyp sóz alǵan Qazaqstan halqy Assambleıasy Tóraǵasynyń orynbasary Janseıit Túımebaev óte qysqa merzimde egemen eldiń zaıyrly, quqyqtyq jáne birtutas memleket retindegi negizin qalap qana qoımaı, jas memleketti halyqaralyq qoǵamdastyqtyń beldi múshesine aınaldyrǵan Elbasy Nursultan Nazarbaevtyń tarıhı róli men yqpaly týrasynda keńinen baıandady.
– Ár memlekettiń ózin saqtaýy, keleshek urpaqqa jetýi eń birinshi kezeńde sol eldi basqaryp otyrǵan kóshbasshyǵa baılanysty. Bul turǵydan kelgende Qazaqstan baqytty memleket. О́ıtkeni Keńes Odaǵy ydyraǵan 1991 jyly enshisin teńdeı bólip alǵan memleketter óz kúnderin ózderi kóre bastady. Osyndaı kezeńde memleketti basqarýdyń enshisi bizdiń Tuńǵysh Prezıdentimiz Nursultan Nazarbaevtyń peshenesine jazyldy. Jyl saıyn jeltoqsan aıynda esebimizdi túgendep, qorytyndylap otyramyz. Salystyrýdyń qarapaıym ǵana ólshemderi bar: ekonomıka, saıasat, mádenıet, ǵylym, halyqtyń ál-aýqaty. Sonyń barlyǵyn ótken kezeńdermen jáne kórshi memleketter deńgeıimen salystyra otyra, bizdiń úlken jetistikke kóterilgenimiz tarıhı fakt, – degen ol Nursultan Ábishulynyń aımaqtyq, jahandyq máselelerdiń sheshilýine der kezinde atsalysyp, halyqaralyq jaǵdaıdy retteý maqsatynda tyń ıdeıalar usyna bilgen suńǵylalyǵyna aıryqsha toqtaldy.
– Elbasynyń Túrki áleminiń tuǵyrly tulǵasy bolýynyń ózi úlken áńgimelerge arqaý bolatyn jaǵdaı.Túrki dúnıesi sonaý Túrki qaǵanatynan keıin birlesken emes, sol kezeńnen keıin tek XX ǵasyr sońynda tamyry bir týys jurt qaıta uıysty, – degen Janseıit Túımebaev túrkııalyq pýblısıst, professor Kýrshad Zorlýdyń Elbasy N.Á.Nazarbaevtyń kemeńgerligi men lıderlik qyryn zerdelegen «Nazarbaev kóshbasshylyǵy: Uly dalanyń órleýi» atty eńbegi úshin Assambleıa atynan zor alǵys bildirip, «Meıirim» medalimen marapattady. Budan soń atalǵan kitaptyń resmı tanystyrylymy ótip, jınalǵan jurtshylyq zor yqylaspen qabyl aldy. Tuńǵysh Prezıdent – Elbasy Nursultan Nazarbaevtyń memleket qurýdaǵy dańǵyl jolyn, el basqarý modeli men kóshbasshylyq qyryn tereń taldaǵan zertteý eńbek áýeli qazaq tilinde jaryq kórse, taıaý kúnderi Túrkııada 5 myń dana taralymmen basylyp shyqpaq.
Dóńgelek ústelge moderatorlyq etken Halyqaralyq Túrki akademııasynyń prezıdenti Darhan Qydyráli eńbektiń Tuńǵysh Prezıdenttiń memleket qurý jolyndaǵy kóshbasshylyq qyryn tanýǵa jáne Qazaqstannyń táýelsizdik jyldaryndaǵy qalyptasý kezeńin zertteýshilerge taptyrmaıtyn kómekshi qural ekenin atap ótti. Sondaı-aq «Nazarbaev fenomenin» zertteý jumystaryna arqaý etken saıasattanýshy ǵalymdar men pýblısıst-qalamgerlerdiń kóp ekenin, osy rette avtordyń týyndysy Elbasy Nursultan Nazarbaevtyń saıası qyzmetin uzaq jyldar boıy turaqty zertteýimen erekshelenetinin aıtty. Atalǵan týyndyda Elbasynyń túrki dúnıesiniń yntymaqtastyǵyn nyǵaıtýdaǵy róli keńinen taldanǵan. Eń áýeli N.Nazarbaevtyń kóshbasshylyǵyna qatysty uǵymdyq jáne teorııalyq maǵlumattar usynylyp, jumystyń empırıkalyq bóliminde júrgizilgen saýalnamadan alynǵan nátıjeler berilgen. Kitapty qolǵa alǵan oqyrman Elbasynyń daralyǵyna ǵana emes, sonymen qatar Qazaqstandy jaqynnan tanyp, túrki álemine qysqa saıahat jasaıtyny anyq.
– «Birlik bolmaı tirlik bolmaıdy» degen qos elge ortaq sóz bar. Sondyqtan jańa dáýir júıesi Qazaqstan men Túrkııanyń tyǵyz baılanysyp, jaqyndasýyn talap etedi. Túrik jurty sizderdiń qysqa ýaqyt ishinde qol jetkizgen jetistikterińizge súısine qarap otyr. Qazaqstan táýelsizdik alǵaly beri Túrkııada qazaqsha biletin, qazaqsha sóıleıtin jandar kóbeıdi. Tarıhtaǵy ǵasyrlar boıǵy qazaq dalasynyń damyǵan jetistigi qazirgi ýaqytta Túrkııa álemine baǵyt-baǵdar bolýda. Osy sebeppen Qazaqstan modelin zerttep-zerdeleý úshin shamamen 20 jyl boıy Qazaqstandaǵy jańalyqtar men ózgeristerdi muqııat baqyladym. Zertteý eńbek kelesi jyldardan bastap Túrkııanyń joǵary oqý oryndarynda oqytylady dep senemin, – deıdi kitap avtory Kýrshad Zorlý.
Qazaqstandaǵy ózbek jurtshylyǵynyń ókili, Májilis depýtaty Fahrıddın Qarataev atalǵan eńbektiń saıasattaný, áleýmettaný ǵylymdarynyń sońǵy ozyq ádis-tásilderin paıdalana otyryp jazylǵanyn, bul rette avtordyń sońǵy jyldary jıǵan tyń derekter men jeke tájirıbesin sarp etken orasan eńbegi baıqalatynyn jetkizdi.
– Avtor túrki tektes baýyrlas elderdegi halyq arasynda saýalnama júrgizip, qoǵamdyq pikir aınasyn óz eńbeginde dáıekti paıdalanady. Tuńǵysh Prezıdentti Túrki áleminiń daraboz lıderi qarapaıym halyqtyń qaıratkeri retinde tanylǵany, onyń esimi Qazaqstan eliniń balamasyna aınalǵanyn aıqyndap jazyp shyqqan, – degen ol oqyrman retinde avtorǵa alǵys bildirip, jaryq kórgen eńbektiń mán-mańyzy men qundylyǵynyń joǵary ekendigin atady.
Budan bólek, jıynǵa qatysqan Májilis depýtaty Saýytbek Abdrahmanov túrki dúnıesin biriktirýdegi Nazarbaev eńbeginiń orasan ekendigin aıta kelip, jaqsy kúnderdi bylaı qoıǵanda, qıyn kúnderdiń ózinde túrki birligin nyǵaıtýǵa ólsheýsiz úles qosqan tulǵa retinde yqpaly zor dep tujyrymdasa, belgili qyrǵyzstandyq ǵalym, túrkolog Qadyraly Qonqobaev, Nazarbaev Ýnıversıtettiń professory Iýlaı Shamıloglý, Tuńǵysh Prezıdent – Elbasy kitaphanasynyń jetekshi zertteýshisi Ǵazız Telebaev, sondaı-aq Qazaqstan halqy Assambleıasynyń ókili Ásker Pırıev jańa basylym týraly oı-pikirlerin ortaǵa salyp, Elbasynyń túrki álemindegi róline qatysty lebizderin bildirdi. Jıyn sońynda akademııa basshysy Darhan Qydyráli Kýrshad Zorlýǵa arnaıy qurmet kórsetip, Halyqaralyq Túrki akademııasynyń Qurmet gramotasymen marapattady.
