Is-shara barysynda mamandar sonymen birge dúnıe júzi elderindegi mýzykalyq arheologııanyń zerttelý máseleleri, elimizdegi mýzeıler qoryndaǵy arheologııalyq mýzykalyq aspaptardyń saqtalý deńgeıi jáne olardy qaıta qalpyna keltirýdiń ádisterin júıeleý taqyrybyn ortaǵa saldy.
«Qazirgi tańda mýzykalyq arheologııany óz elimizde kenje qalǵan ǵylym salasy deýden esh qatelespeımiz degen sala mamandary Qazaqstandaǵy mýzykalyq arheologııanyń negizgi problemalary jáne damytý máselelerin talqylady. Mýzykalyq arheologııa qazba jumystarynan tabylǵan mýzykalyq aspaptardy zertteıtin mýzykataný ǵylymynyń bir salasy deıtin bolsaq, sońǵy jyldary elimizde jáne kórshi memleketterde arheologııalyq qazba jumystar barysynan tabylyp jatqan mýzykalyq aspaptar osyǵan dálel bola alady» deıdi Yqylas atyndaǵy halyq aspaptar mýzeıiniń ǵylymı qyzmetkeri Abzal Súleımenov.
Konferensııaǵa elimizdiń mýzeıleri men ǵylymı-zertteý ortalyqtarynan kelgen arheolog jáne etnolog mamandar, ǵylymı qyzmetkerler jáne shet elden kelgen ǵalymdar qatysty.
«Qazaqstannyń mýzykalyq arheologııasy tereńirek zertteýdi talap etedi. Bul ǵylym arqyly bolashaqta kóptegen jańalyqtar men sensasııalar ashylatyny sózsiz. Sondyqtan mýzykalyq arheologııanyń qazirgi tańnan bastap damýy bizdiń tarıhymyz ben mádenıetinimizdiń damýyna zor úles qosatyny anyq» degen keleli máseleni qozǵaı otyryp, mamandar kóne mýzykalyq aspaptarǵa keshendi zertteý júrgizý, mýzeı qoryna arheologııalyq qazbalar nátıjesinde tabylǵan kóne mýzykalyq aspaptardy jınaý, sheberlerge kóne mýzykalyq aspaptardyń kóshirmesin jasatý, mýzykalyq arheologııa ǵylymyn qosymsha ǵylymdarmen ıntegrasııalaýǵa baılanysty qarar qabyldandy.
Konferensııanyń sońynda qatysýshylarǵa sertıfıkattar tabystaldy.
ALMATY
