– Atalǵan dıalog alańy Qazaqstan men Germanııa, Qazaqstan men Eýropa qatynastarynyń áleýmettik-saıası jáne ekonomıkalyq máselelerin keń aýqymda talqylaýǵa zor múmkindik beredi. Bul – elimizdiń Eýropadaǵy alǵashqy jobasy. Jahandyq turaqsyzdyq jaǵdaıynda mundaı ınstıtýttyń róli arta túsedi dep sanaımyz, – dedi Memleket basshysy.
Prezıdenttiń pikirinshe, sońǵy úsh jyl ishinde álemdegi geosaıası, geoekonomıkalyq ahýal eleýli ózgeristerge ushyrady. Sanksııalar men saýda-sattyq shekteýler dástúrli dıplomatııalyq quraldardy jıi almastyra bastady.
– Álemdik ekonomıka elder men óńirlerdiń damýynda dısproporsııa, tehnologııalyq teńsizdik, qarjy júıesindegi álsizdik sııaqty «sozylmaly dertke» tap bolýda. Osyndaı kúrdeli jaǵdaıda elimizdiń syrtqy ekonomıkalyq jáne saýda saıasaty ashyq, pragmatıvti jáne qarapaıym. Qazaqstan ártúrli birlestiktermen, eldermen jáne kompanııalarmen ózara tıimdi yntymaqtastyq ornatý úshin ashyq bolyp qala beredi, – dedi Qasym-Jomart Toqaev.
Memleket basshysy Qazaqstannyń syrtqy saıasattaǵy basymdyqtaryna toqtalyp, Eýropa odaǵymen qarym-qatynastarǵa basa mán beretinin aıtty.
– Biz Eýropada bolyp jatqan oqıǵalardy muqııat qadaǵalap otyramyz, Eýropa kóshbasshylarymen turaqty túrde syndarly dıalog ornattyq. Qazaqstan Eýropa odaǵynyń Ortalyq Azııa óńirine qatysty jańa ustanymdaryna qoldaý kórsete beredi. Bizdiń Eýropamen yqpaldastyǵymyz, negizinen, Germanııamen aradaǵy ekonomıkalyq, tarıhı, mádenı baılanystar boıynsha erekshelenedi, – dep atap ótti Qasym-Jomart Toqaev.
Memleket basshysy forým qatysýshylarynyń nazaryn Qazaqstannyń qarqyndy ósip kele jatqan ınvestısııalyq áleýetine aýdardy.
– Bizdiń kórshi eldermen tyǵyz ıntegrasııamyz irgeles naryqtarǵa shyǵýǵa qolaıly jaǵdaı jasaıdy. Búginde 500-den astam adam bizben shekaralas kórshi elderde turady. Eýrazııalyq ekonomıkalyq odaq aıasynda eńbek qozǵalysy, qarjylyq qyzmet kórsetý, kapıtal jáne saýda sekildi tórt erkindik boıynsha basymdyqqa ıe bolǵymyz keledi. Ortalyq Azııadaǵy jaqyn kórshilerimizben tyǵyz yntymaqtastyǵymyzdy jalǵastyra beremiz. Sondyqtan Qazaqstanda jumys istep jatqan nemis kompanııalary úshin qosymsha naryqqa shyǵýǵa múmkindik ashylady, – dedi Qasym-Jomart Toqaev.
Prezıdenttiń aıtýynsha, Úkimet aýyl sharýashylyǵyna, jańa tehnologııalar men sıfrlyq qyzmetter kórsetý salalaryna nemis ınvestısııasyn tartý isine qoldaý kórsetýge ázir.
– Biz «Sıfrlyq Qazaqstan» arnaıy memlekettik baǵdarlamasyn qabyldadyq. Germanııadaǵy Fraýngofer ınstıtýty osy strategııalyq baǵdarlamany ázirleýge qatysty. О́ńirimizdegi barlyq startaptarǵa qoldaý kórsetý maqsatynda Astana-hab jáne IT-ýnıversıtet ashtyq. 3 jyldan keıin elimizdiń IT salasynda daryndylar pýly qalyptasady dep úmittenemiz. Jalpy, biz sıfrlandyrý salasynda úkimettik qurylymdar deńgeıinde de, jeke kompanııalar deńgeıinde de yntymaqtastyq ornatýǵa daıynbyz, – dedi Qazaqstan Prezıdenti.
Qasym-Jomart Toqaev Germanııany Qazaqstannyń strategııalyq seriktesi ekenin taǵy da atap ótip, elimizdegi nemis bıznesine tıisti jaǵdaı jasaıtynyn aıtty.
– Biz sizderge barynsha jeńildikter jasaýǵa daıynbyz. Sonyń ishinde arnaıy ekonomıkalyq aımaqtarda salyqtan bosatý, ınfraqurylym usyný jáne basqa da jeńildikter bar. Men «Qazaqınvest» pen Qazaqstannyń tikeleı ınvestısııalar qoryna Germanııa ınvestorlarymen yntymaqtastyq jasaıtyn arnaıy ofıs ashý jóninde tapsyrma berdim, – dedi Memleket basshysy.
Germanııa bıznesiniń elimizdegi jobalaryn iske asyrýǵa «Báıterek» holdıngi men Qazaqstan damý banki qoldaý kórsetetin bolady.
– Bul elimizdiń ınvestısııalyq júıesi úshin jańa shara bolyp sanalady. Biz buǵan deıin eshqandaı elge mundaı jaǵdaı jasaǵan emespiz. Osy bastama durys uıymdastyrylǵan jaǵdaıda Úkimet pen ınvestorlar muny tıimdi jumys isteıtin tetikke aınaldyrady dep senemin, – dedi Qasym-Jomart Toqaev.
Berlındegi AHISA kongress-ortalyǵynda ótken is-sharaǵa GFR úkimetiniń joǵary laýazymdy qyzmetkerleri, sarapshylar, jýrnalıster jáne nemis bıznesiniń 250-den astam ókili qatysty.
