Kitaphana Qazaqstan mádenıetiniń, biliminiń, ǵylymynyń damýyna eleýli úles qosyp, joǵary deńgeıde aqparattyq qoldaý kórsetedi, paıdalanýshylardyń kitaphana resýrstaryna, barlyq taratylatyn aqparattarǵa ashyq qol jetimdilikti usynady.
Ortalyq ǵylymı kitaphana 1932 jyly KSRO Ǵylym akademııasynyń Qazaqstandaǵy bólimi negizinde qurylǵan.
Kitaphanada 6 oqyrman zaly jumys isteıdi, ǵalymdarǵa, ǵylymı qyzmetkerlerge, JOO oqytýshylaryna, mamandarǵa, magıstranttarǵa, stýdentterge jáne t.b. oqyrmandarǵa qyzmet kórsetiledi.
Kitaphana qorlary ulttyq jáne shetel basylymdarynyń, dıssertasııalardyń, ǵylymı eńbekterdiń, Qazaqstan ǵalymdarynyń jeke kitaphanalarynyń baı toptamalarynan turady. Qordyń kólemi 5,0 mln. astam kitapty quraıdy.
Sırek kitaptar, qoljazbalar jáne ulttyq ádebıetter qory 210 myń danaǵa jýyq sırek kitaptardy, qoljazbalardy, fotokóshirmelerdi, mıkrofılmderdi, dıssertasııalardy, avtoreferattardy, qazaq tilindegi kitaptardy, TMD halyqtary tilderindegi ádebıetterdi jáne merzimdi basylymdardy quraıdy. Sırek kitaptar men qoljazbalardyń jalpy hronologııasy: XII, XVI-XXI ǵǵ. (1940 jylǵa deıingi) basylymdar. ǴK álemniń 71 eliniń 630 ǵylymı mekemelerimen seriktes bola otyryp, 1951 j. bastap halyqaralyq kitapalmasý (HKA) júrgizedi.
1983 jyldan bastap kitaphana óz aldyna kitaphanalyq-bıblıografııalyq úrdisterdi avtomattandyrý boıynsha jumys júrgizip keledi. Ǵylymı kitaphanada MarcSQL avtomattandyrylǵan aqparattyq kitaphanalyq júıe (AAKJ) baǵdarlamasymen jumys isteıdi. Ǵylymı kitaphana óziniń Sandyq kitaphana úlgisin jasaýshy bolyp tabylady, onda 1 myńnan astam sırek biregeı basylymdardyń ataýlary, 40 jeke derekqory, Qazaqstan ǵalymdary eńbekteriniń elektrondyq toptamalary bar.
Ortalyq ǵylymı kitaphana ǵylymı jýrnaldar baspalarynyń derekqoryna; Science Direct platformasyndaǵy Elsevier baspasynyń elektrondyq resýrstaryna (sońǵy bes jyldyqta 2 myńnan astam jýrnaldan turatyn 23 taqyryptyq toptama), 40 mln. jazýdan turatyn jarııalanymdardyń dáıeksóz alý ındeksi bar Scopus jalpy ǵylymı referatıvter bazasyna, Reseı memlekettik kitaphanasynyń (RMK) ǵylymı dıssertasııalaryna, e-library tolyqmátindi ǵylymı qujattaryna, Thomson-Reuters, Springer baspasynyń Web of Knowledge derekqoryna qol jetkizýge múmkindik beredi. Kitaphanada qashyqtyqtan qyzmet kórsetý – qujattardy elektrondyq jetkizý (QEJ) qyzmeti engizilip, tıimdi qoldanylyp keledi.
Ortalyq ǵylymı kitaphana respýblıkanyń ǵylymı-bıblıografııalyq qyzmetiniń ortalyǵy retinde ǵylymı bıblıografııalyq, aqparattyq materıaldardy daıyndaıdy, 4 bıblıografııalyq: onyń ishinde «Qazaqstan ǵalymdarynyń bıobıblıografııasy», «Uly tulǵalar», «Qazaqstan jáne álemdik qaýymdastyq», «Kitaphana isiniń kórnekti qaıratkerleri» serııalary boıynsha zııatkerlik menshik sertıfıkattaryna ıe.
Ortalyq ǵylymı kitaphana – QR BǴM ǵylymı-zertteý mekemeleriniń janyndaǵy 14 kitaphanany qamtıtyn kitaphanalar torabynyń ortalyǵy.
Ǵylymı kitaphana Ǵylym akademııalarynyń halyqaralyq qaýymdastyǵynyń (ǴAHA), QR Kitaphanalar qaýymdastyǵynyń, Qazaqstan kitaphanalarynyń aqparattyq konsorsıýmynyń múshesi bolyp tabylady.
ALMATY
