Qazaqstanǵa «Shymbulaqtyń» baýyrlas-kýrorty – «Roza Hýtor» taý kýrortynyń delegasııasy kelgendigi aldaǵy ýaqyttaǵy týrıstik yntymaqtastyqqa yqpal etedi, dep baǵamdaıdy sarapshylar. Atalǵan kýrorttyń halyqaralyq qatynastar jáne týrızm departamentiniń basshysy A.Markov qazaqstandyq týroperatorlar men týragenttikterge «Roza Hýtor» múmkindikterin, yntymaqtastyqty damytý men 2019-2020 jyldarǵa ázirlengen jańalyqtardy tanystyrdy.
Qazaqstan men Reseı arasyndaǵy týrıstik aǵyn sońǵy jyldary belsendi túrde ósýde. 2018 jyldyń qazan aıynda qol qoıylǵan eki eldegi eń tanymal «Shymbulaq» jáne «Roza Hýtor» taý kýrorttary arasyndaǵy yntymaqtastyq týraly Memorandým buǵan óz úlesin qosty. Memorandým aıasynda seriktes kýrorttar kýrorttyq-saýyqtyrý demalysyn, sport pen týrızmdi uıymdastyrý men damytýda aqparattyq, bilim berý, ádistemelik jáne konsýltasııalyq qoldaýdy júzege asyrady. Aıtpaqshy, jazda «Roza Hýtor» Qazaqstannan myńynshy kelýshini qabyldady, bıylǵy maýsymda kýrort kem degende nátıjeni eki eseleýge úmittenedi. «Turaqty áýe qatynasyn uıymdastyrýdyń arqasynda Qazaqstannan týrıster «Roza Hýtorǵa» jıi keledi. Munda olardy eń aldymen, belsendi jáne ártúrli demalys túrleri eliktiredi: taýdaǵy jaıaý baǵyttar, rodelban, aspaly kópir, bıik taýly átkenshekter, velojarys, Qara teńizdegi fırmalyq jaǵajaı. Bizde balalardyń bos ýaqytyn ótkizýi jaqsy uıymdastyrylǵany aıan, meıramhanalardyń úlken tańdaýy, konserttik baǵdarlama da bar. Kezekti qysqy maýsymǵa biz birqatar jańa belsendilikter men tıimdi usynystardy daıyndadyq, olar týraly Qazaqstandaǵy áleýetti seriktesterimizge baıandaýǵa asyqpyz», dep atap ótti «Roza Hýtor» TK halyqaralyq qatynastar jáne týrızm departamentiniń basshysy Arkadıı Markov.
«Roza Hýtor» mamandarynyń Qazaqstanǵa sapary barysynda ózge de mańyzdy is-sharalarmen qatar «Turan» jáne Almaty Management University stýdentterine «Oqıǵaly týrızm týrıstik qyzmetterdi damytýdyń perspektıvaly túri retinde» taqyrybynda leksııa ótkizdi. Qazaqstandyq stýdentter halyqaralyq kýrorttardyń tarıhy jáne damý josparlarymen tanysyp, týrızmdegi serpindi damyp kele jatqan baǵyt týraly aqparat almasty.
