30-shy jyldardyń ortasyna taman Máskeýge kelip, M.Lomonosov atyndaǵy ýnıversıtettiń matematıka-mehanıka fakýltetine oqýǵa túsedi. Ony oıdaǵydaı bitirgen soń KSRO Halyq Komıssarlary Keńesi janyndaǵy Qazaq respýblıkasynyń Turaqty ókildigine qyzmetke ornalasady. Respýblıka oqý-aǵartý halyq komıssarıatynda basqarma bastyǵy, oqý-aǵartý komıssarynyń orynbasary bolyp isteıdi.
1941 jyldyń qańtarynda Á. Qanapın “Sosıalıstik Qazaqstan” gazetiniń jaýapty redaktory bolyp bekitiledi. Bul jerde ol bir jyldaı istep, 1942 jyly Qaraǵandy oblystyq partııa komıtetiniń hatshylyǵyna aýysady.
Uly Otan soǵysynan keıin komsomoldyq jumysqa jiberilip, bes-alty jyldaı Qazaqstan LKSM Ortalyq Komıtetin basqaryp, qurmet pen bedelge ıe bolady. Lenın ordenimen nagradtalady.
1951-1954 jyldary Almaty oblystyq partııa komıtetiniń birinshi hatshysy, 1955 jyly Semeı oblystyq partııa komıtetiniń hatshysy bolyp isteıdi de, sodan soń respýblıka Mádenıet mınıstri bolyp taǵaıyndalady.
Á. Qanapın ómiriniń sońǵy shırek ǵasyryn oqytýshylyq qyzmetke arnady. Almaty shet el tilderi ınstıtýtynda kafedra meńgerýshisi bolyp istedi. Úlken laýazymdy qyzmetterden keıin ustazdyqqa aýysqan Ábekeń doktorlyq dıssertasııa qorǵap, jas mamandar daıarlaýǵa, ǵylymı kadrlardy jetildirýge laıyqty úles qosty.
