45 jasar Ashat ótken 20 jylyn ókinishpen eske alady. Ol 16 jasynan esirtkiniń shyrmaýyna baılanǵan. О́mirin óksik etken aq untaq úshin urlyq jasap, bes márte temir torǵa da toǵytylypty. Segiz jyl buryn qatty aıazda aıaǵyn úsirip, bir bashpaıynan aıyrylǵan. Sol jarasy ókinishti kúnniń belgisi bolyp qalǵandaı. Biraq búgin bári basqasha.
– Qazir meniń ómirim túbegeıli ózgerdi. О́ıtkeni, men jaratqanǵa senip, namazǵa jyǵyldym. Bul tez bolǵan joq, árıne. Qanshalyqty kóp kúná jasaǵanymdy túsinip, buǵan deıin durys ómir súrmegenimdi uǵyndym. Jaqyndaryma qanshama zııan keltirdim, – deıdi Ashat.
25 jyl temekige táýeldi bolyp, qazir ony da tastaǵan. Esirtkini de umytqanyna on jyl. Jańadan shańyraq kóterip, ımandy úıdiń ıesi bolyp otyr. Narkologııalyq ortalyqta nusqaýshy qyzmetin atqaratyn Islamnyń da taǵdyry aldyńǵy keıipkerge uqsas. Aqtóbelik jigit Kókshetaýǵa emdelýge kelip, osy jaqta ómirin aq paraqtan bastasam deıdi.
– Men jaqsy sportshy edim. 1990 jyldary esirtki shegý sánge aınaldy. Eliktegen de shyǵarmyz. Ol kezde tótenshe jaǵdaı basqarmasynda qyzmet istedim. Kásibı súńgýirmin. Esirtkiniń saldarynan jumysymnan aıyryldym. Qazir mine, bir jarym jyldan beri esirtkini doǵardym,–deıdi qala turǵyny Islam.
Týǵan ólkesinde, burynǵy shańyraǵynda eki balasy men jary qalypty. Aralasyp turady. Súıikti mamandyǵyna qaıta oralý qıyn deıdi. О́ıtkeni, ótkeni aldynan shyǵady. Qazir oblystyq narkologııalyq ortalyqtaǵy ózi sııaqty ózge de jandarǵa basynan ótken oqıǵasyn aıtyp, túzý jolǵa salýǵa járdemdesýde. Oblystyń bas narkology Ǵalııa О́serbaıqyzynyń aıtýynsha, esirtkiden bas tartqandar baqylaýda bolmaq.
– Biz narkologııalyq naýqastarymyzdy bir jyl boıy baqylaımyz. Eger naýqas bir jyl kóleminde aı saıyn turaqty túrde qaralyp tursa jáne ol esirtkiden bas tartsa, ýchaskelik ınspektor ony rastasa, jumys orny men dárigerlik komıssııa minezdeme berse, biz ol adamdy esepten shyǵaryp tastaýǵa quqylymyz, – deıdi oblystyq psıhologııalyq-ońaltý ortalyǵynyń jetekshisi Ǵalııa Muhamedıarova.
Búginde oblysta 533 adam esirtkige táýeldi retinde tirkelgen. Onyń bireýi – jasóspirim.
