«Ázirge tergeý júrip jatyr. Tergeý nátıjesi bizdiń jaqqa berilgen joq. Sondyqtan, kúte turaıyq. Olar (is-materıaldary) qazir Egıpettiń Bas prokýratýrasynda, sol eldiń syrtqy ister mınıstrligi arqyly bizge beriledi. Jańa jylǵa deıin, osy aptanyń sońy nemese kelesi aptada marqumnyń denesi elge jetkiziledi dep kútýdemiz», - deıdi Muhtar Tileýberdi Úkimet otyrysynan keıin.
Muhtar Tileýberdiniń aıtýynsha, sýısıd - eń birinshi nusqa retinde qarastyrylyp jatyr.
Esterińizge sala keteıik, buǵan deıin SIM Egıpette óz qyzmetkeriniń qaıtys bolǵanyn rastaǵan bolatyn. Keıbir aqparat quraldary qazaqstandyq dıplomattyń óliminiń jumbaq mán-jaıy týraly habarlaǵan edi.
Atap aıtqanda, E. Joldasovtyń kireberiste qoldary artyna baılanyp, óli kúıinde tabylǵany týraly aqparat jarııalandy. Al Syrtqy ister mınıstrliginiń resmı ókili Aıbek Smadııarov Qazaqstan Respýblıkasynyń Egıpettegi Elshiliginiń qyzmetkeri Elaman Joldasovtyń qazasyna qatysty qaýesetke túsinik berdi. Onyń aıtýynsha, marqumnyń denesinde eshqandaı daq, kógerý, qandaı da bir jaraqat bolmaǵan. Aıaq-qoly baılanbaǵan.
