Ekspedısııa barysynda álemge áıgili «National Geographic Qazaqstan» jýrnalynyń ókilderi osy jylǵy qyrkúıektiń 2-12 aralyǵynda Jaıyqtyń Batys Qazaqstan oblysy shekarasynan bastap, Atyraý oblysy aýmaǵyndaǵy Kaspıı teńizine quıatyn tusyna deıingi bóligin súzip shyqqan edi. Olar 2 myńǵa jýyq shaqyrymdy júrip ótip, bes myńǵa jýyq fotosýretti taspaǵa tartyp alǵan bolatyn.
Ekspedısııanyń maqsaty – eń aldymen, jýrnal betinde Batys óńirimizdiń eń basty sý kúretamyry – Jaıyq ózeniniń búgingi aıanyshty ahýalyn kórsetý arqyly qoǵamda silkinis týǵyzý, ýaqyt kúttirmeı, tez sheshýdi talap etetin kúrdeli máseleni Qazaqstan Respýblıkasy Úkimetine jetkizý edi.
«KQK óziniń negizgi jumysynan bólek, aımaqtaǵy ekologııalyq problemalarǵa da den qoıyp keledi. Osy baǵytta 2001 jyldan beri 9 mlrd teńge bólgen. Ras, Jaıyqqa qatysty sońǵy jyldarda oryn alǵan problemalar adam shoshyrlyq jaǵdaıǵa jetken. Bul máseleni eki eldiń atqarýshy organdary talqylap jatyr», dedi «Kaspıı Qubyr Konsorsıýymy» AQ-nyń atqarýshy dırektory Mellıat Karabalın.
Ekspedısııa barysynda ózenniń tereńdigi ólshendi, sýy men topyraǵynan synamalar alyndy, flora men faýnaǵa monıtorıngtik zertteýler jasaldy, ózenniń oń jáne sol jaǵalaýlaryn mekendeıtin turǵyndarmen kezdesýler ótkizilip, jergilikti kónekóz qarııalardyń pikirleri eskerildi.
