Merekelik sharaǵa oblys boıynsha 350 bala shaqyrtý aldy. Olardyń arasynda jetim balalar, az qamtylǵan otbasynan shyqqan jáne erekshe kútimdi qajet etetin balalar bar. Shara ınteraktıvti shoý-qoıylym túrinde ótip, oǵan balalardyń bári qatysty.
- Búginde elimizdiń barlyq qalalarynda jańajyldyq erteńgilikter ótip jatyr. Atyraýdaǵy bul shara esterińizde qalady degen oıdamyn. Barshańyzǵa merekelik kóńil kúı, armandaryńyzdyń oryndalýyn tileımin. Bolashaqta elimizdiń naǵyz patrıottary bolý úshin sabaqtaryńyzdy jaqsy oqyp, maqsattaryńyzǵa jetińizder. Bizde oǵan qajet barlyq jaǵdaı bar. Jańa mektepter, oqý ortalyqtary salynyp jatyr. Aldaǵy jyly Atyraýda jastar men oqýshylar saraıy ashylady. Ol ár balanyń qajet bilim men daǵdyny meńgerýine múmkindik beretin oryn bolady, - dedi oblys ákimi.
Aımaq basshysy el bolashaǵy jastarǵa memleket tarapynan aıryqsha kóńil bólinip otyrǵanyn atap ótti. 2019 jyldy Elbasy Jastar jyly dep jarııalady. Kóptegen mańyzdy sharalar uıymdastyryldy.
Jańajyldyq merekelik baǵdarlama teatrlandyrylǵan qoıylymmen, shyrsha janyndaǵy dástúrli hormen jalǵasty. Al, eń erekshesi - syılyqtar boldy. Oblys ákimi Mahambet Dosmuhambetov balalarǵa jańajyldyq táttiler men bilimderin jetildirýge kómektesetin planshet syılady.
Atyraý oblystyq bilim berý basqarmasy basshysynyń mindetin atqarýshy Jansulý Tóremuratova bul syılyqtyń balalarǵa mektepte kómekshi qural bolatynyn aıtady. Planshetke barlyq oqý baǵdarlamasy júktelgen, ınternetke qosylmaı-aq aqparat alýǵa bolady.
Jańajyldyq merekelik qoıylym ertegi keıipkerlerimen sýretke túsýmen aıaqtaldy. Balalarǵa bul naǵyz ertegideı áser syılady.
