Prezıdenttiń baspasóz hatshysy Berik Ýálı sóz basynda jýrnalısterdi kele jatqan Jańa jylmen quttyqtap, 2019 jyldyń aıtýly oqıǵalarǵa toly bolǵanyn atap ótti.
– Shymyldyǵy jabylatyn jyl el jylnamasynda aıtýly oqıǵalarymen este qaldy. Bul, eń aldymen, egemen elimizdiń qalyptasyp, damýyna zor eńbek sińirgen Qazaqstannyń Tuńǵysh Prezıdenti – Elbasy Nursultan Nazarbaevtyń el basqarý tizginin Qasym-Jomart Toqaevqa tapsyrǵan sátten bastaý alady. Odan keıingi elimizdiń saıası ómirinde mańyzy zor oqıǵa – Prezıdent saılaýy. Bıliktiń aýysýy, saılaý naýqany Ata Zańymyzǵa sáıkes júzege asyryldy. Qasym-Jomart Kemeluly halyq aldynda ant bergennen keıin Memleket basshysy retinde birden jumysqa bilek sybana kirisip ketti. Elimizdiń búkil óńirin aralap, halyqtyń áleýmettik-ekonomıkalyq ahýalymen tanysty. Kóptegen halyqaralyq kezdesý ótkizip, shet- elderge resmı, memlekettik saparlar jasap, mańyzdy kelissózder júrgizdi, – dedi Berik Ýálı.
Onyń aıtýynsha, Memleket basshysynyń qatysýymen 462 is-shara ótti. Elimizdiń aımaqtaryna 25 ret jumys saparymen bardy. 31 eldiń basshylarymen telefon arqyly sóılesti.
Qasym-Jomart Toqaev Halyqaralyq is-sharalar boıynsha 12 elge saparmen bardy, 9 halyqaralyq jıynǵa qatysty. Prezıdent halyqaralyq jáne óńirlik qaýipsizdikti qamtamasyz etý, memleketaralyq baılanystar men ózara yntymaqtastyqty nyǵaıtý maqsatynda álemdik deńgeıdegi saıası tulǵalarmen 100-ge jýyq halyqaralyq kezdesý ótkizdi. Memleket basshysy 23 sheteldik elshiden senim gramotalaryn qabyldap, Qazaqstannyń shetelderdegi 30 elshisin taǵaıyndady. Sonymen qatar Qazaqstannyń 6 memlekettegi dıplomatııalyq mıssııalary elshilik retinde qaıta quryldy.
Jalpy, bıylǵy 20 naýryzdan beri 45 Zańǵa, 226 Jarlyqqa, 68 О́kimge qol qoıyldy. Prezıdenttiń qatysýymen ótken jıyndar boıynsha 49 hattama toltyrylǵan. Prezdıent bıylǵy 9 aıda 112 796 shaqyrym jol júrdi. Oǵan 181 saǵat 36 mınýt ýaqyt ketken.
Prezıdent Ákimshiliginiń О́tinishterdi qaraýdy baqylaý bólimi men Prezıdenttiń vırtýaldy qabyldaýyna azamattardan 1 tamyzdan beri 15 669 ótinish kelip túsken. Onyń 4025-i Prezıdenttiń vırtýaldy qabyldaýy arqyly qabyldanǵan.
Sonymen qatar baspasóz hatshysy Memleket basshysynyń «Halyq únine qulaq asatyn memleket» tujyrymdamasynyń oryndalyp jatqanyn aıtyp, halqymyzdyń ál-aýqatyn arttyrý maqsatynda mańyzdy bastamalar qolǵa alynǵanyna nazar aýdardy. Osy rette ol qıyn jaǵdaıǵa tap bolǵan otbasylarǵa áleýmettik kómek kórsetý maqsatynda 500 myńnan asa azamattyń 300 myń teńgege deıingi nesıelik qaryzy men ústeme tólemderi keshirilgenin, bul jalpy alǵanda 107 mlrd teńgeni quraǵanyn málimdedi.
Buǵan qosa Sırııadaǵy otandastarymyzdy qaqtyǵys alańynan alyp shyǵý maqsatynda qolǵa alynǵan «Jýsan» operasııalary sátti iske asyryldy.
Memleket basshysynyń otandyq jáne sheteldik BAQ ókilderine bergen 16 suhbaty jarııalandy. Qasym-Jomart Toqaevtyń Qazaqstan Prezıdenti retinde atqaryp jatqan jumystary týraly jalpy 26 derekti fılm túsirilip, respýblıkalyq telearnalarda kórsetildi.
Sondaı-aq Berik Ýálı Jastar jyly aıasynda uıymdastyrylǵan is-sharalarǵa toqtalyp, Memleket basshysy Volonter jylynyń tusaýyn keskenin aıtty.
