Jyl basynan beri memleket tarapynan bıznes ıdeıalary bar kóp balaly otbasylarǵa, jastarǵa jáne múgedek jandarǵa 200 AEK (505 000 teńge) kóleminde tegin granttar berilip jatqany belgili. Aıagóz aýdany boıynsha atalmysh grantty 175 adam ıelenipti. Onyń 92-si - jastar, 15-i - múgedek jandar, 11-i - ózin-ózi jumyspen qamtyǵandar, 57-si - kóp balaly analar. «Osyndaı qoldaýdyń arqasynda ártúrli bıznes bastamalar júzege asty. Tigin sehy, mal bordaqylaý alańdary ashyldy. Ártúrli baǵyttarda kásipterin bastaǵandar kóbeıdi» deıdi aýdandyq Ishki saıasat bóliminiń basshysy Medet Myrzykeshov.
Solardyń biri - kóp balaly ana Ásemgúl Seıitova. «О́zimniń jeke kásibimdi ashpaq oıym bar edi. Biraq úıde balamen otyryp, bul isti qolǵa alýǵa múmkindik bolmady. Sondyqtan memleket usynǵan 505 myń teńge grantqa ótinim bildirip, jobamdy usyndym. Qazir grant arqyly berilgen qarajatqa mal alyp, úıde otyryp-aq kásippen shuǵyldanyp jatyrmyn» deıdi ol.
Shyǵys Qazaqstan oblysy,
Aıagóz aýdany
