Smaıyl Maqyshev Phillips Exeter Academy mektebin bitiretin tuńǵysh qazaq balasy

Qoǵam • 26 Jeltoqsan, 2019

Smaıyl Maqyshov Phillips Exeter Academy mektebin bitiretin tuńǵysh qazaq balasy

118 ret kórsetildi

Qazaqstannan shyqqan oqýshy-kásipker Smaıyl Maqyshov bıyl Phillips Exeter Academy mektebin bitiredi. Bul mektep Niche reıtıngisiniń basynda #1 bolyp turǵan AQSh-taǵy áıgili oqý orny. Máselen, Facebook áleýmettik jelisiniń negizin qalaǵan Mark Sýkerberg te osy mekteptiń maqtanyshy.

Aınash ESALY

Al Smaıyl Maqyshov New Hampshire shtatyndaǵy atalmysh mekteptiń Qazaqstannan shyqqan tuńǵysh túlegi. Ekiniń birine buıyrmaıtyn mundaı mektepke qazaq balasy qaıdan tap boldy desek, sońǵy jyldary Smaıyl úsh startap ashyp, onyń bireýi búkil álemniń oqýshylary qatysqan startaptar konkýrsynda úzdik dep tanylǵan 20 startaptyń sanatyna ilikken. Sondaı-aq Smaıyl AQSh-taǵy kompıýterlik ǵylym olımpıadasyna (USA Computing Olympiad) da qatysady. Bul AQSh-taǵy kompıýterlik baǵdarlamalar boıynsha eń bedeldi jarys bolsa, Smaıyl osy olımpıadanyń Altyn dıvızııasyna deıin jetip (Gold Division), 2019 jyly New Hampshire Science and Engineering Expo olımpıadasynda sandar teorııasy jobasy boıynsha matematıkadan 1 oryndy ıelengen.

Munan da bólek, qazaq balasy atalmysh mekteptiń belsendi kóshbasshysynyń biri. Stýdenttik keńes, Halyqaralyq stýdentter alıansy, Jas kásipkerler klýby, Exeter LaunchX Club sııaqty kóptegen klýbtarǵa jetekshilik etedi.

Endeshe 10 jasynan bastap ózine ór maqsattar qoıǵan Smaıyl bul mektepti qaıdan bildi jáne qalaı irikteýden ótti?

– Men kishkentaı kúnimnen ózime joǵary maqsattar qoıdym. 10 jasymnan bastap ata-anamnan jyraqtamyn. О́z qyzyǵýshylyǵyma sáıkes mektepter aýystyra otyryp, kompıýterlik ǵylym men matematıkadan kúrdeli, jetildirilgen kýrstary bar jáne birikken jobalar men ıdeıalardy birge júzege asyra alatyn qatarlastarym bar mektep tabýǵa sheshim qabyldadym. Jáne izdeýge kiristim de.

Osyndaı mektepterdiń qatarynda jáne tizimde birinshi bolyp, negizi 1781 jyly qalanǵan Phillips Exeter Academy turdy. Jekemenshik mekteptiń stýdentter qalashyǵyna 11 jasymda keldim. Ol meniń júregimdi birden jaýlap aldy. Zertteı kele, izdep júrgenim osy mektep ekendigin túsindim. Bul mektepke barlyq memleketterden halyqaralyq olımpıadalardyń jeńimpazdary, ǵylymı jobalardyń júldegeleri, halyqaralyq deńgeıdegi sportshylar men eń talantty mýzykanttar, qysqasy óz mektepteriniń kóshbasshylary bola alǵan, №1 oqýshylary qabyldanady eken. Men Amerıkada joǵary bilim alǵan aǵamnyń jetekshiligimen jospar túze otyryp, Phillips Exeter Academy-ge ǵana emes, AQSh-tyń eń úzdik top-mektepterine de qatar qujattar tapsyrdym. Bul mektepterdiń barlyǵyna AQSh ýnıversıtetterimen birdeı derlik irikteýler júredi. Uzyn-sonar anketa toltyryp, óziń týraly ómirlik maqsattaryńdy, jetistikterińde túgel tize otyryp, esse jazasyń jáne SSAT testin tapsyrasyń.

Phillips Exeter Endoýment mektebiniń Qory 1,3 mıllıard AQSh dollaryn quraıdy jáne álemdegi eń iri mektep sanalady. Jáne dúnıejúzindegi eń iri mektep kitaphanasy da osynda. Meni tańdandyrǵany, kýrstardy tańdaýdyń asa aýqymdy múmkindikteri boldy. Men bul jerde deńgeıi men kúrdeliligi óz qabiletime sáıkes jospar quryp, kýrstardy tańdaı alamyn, – deıdi Phillips Exeter Academy mektebin bitiretin tuńǵysh qazaq balasy.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz