Kelisimniń maqsaty GREKO men baǵalaý toptarynyń ókilderine azamattyq, ákimshilik jáne qylmystyq jaýapkershilikten, qyzmettik mindetterin oryndaýǵa baılanysty olardyń bizdiń elimizge kelý kezinde jeke ustap turý men qamaýlardan ımmýnıtetter usyný bolyp tabylady.
Senator Nurjan Nursıpatov kelisimdi ratıfıkasııalaý sybaılas jemqorlyqqa qarsy zańnamany jetildirýge, sondaı-aq álemdik reıtıngterde Qazaqstannyń sybaılas jemqorlyq kórsetkishteriniń ındeksin tómendetýge yqpal etetinin atap ótti.
Qazaqstan men Kıpr úkimetteri arasyndaǵy tabysqa salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly Konvensııa men oǵan Hattama ratıfıkasııalandy.
Ýaǵdalasýshy memleketterdiń árqaısysy salyq tóleýshige ýaǵdalasýshy memleketterdiń tek birinde bir ret qana salyq tóleý múmkindigin qamtamasyz etedi. Basqa memleket oǵan tólengen salyq somasyna esep beredi nemese salyq salynatyn jıyntyq tabystan ekinshi memlekette salyq salynǵan bóligin alyp tastaıdy.
Senator Olga Perepechına salyq konvensııalaryn nemese kelisimderdi qabyldaý transshekaralyq saýdany jeńildetip, ınvestısııalar tartýdy qamtamasyz etetinin atap ótti. Sońǵy 10 jylda salyqtyq konvensııalar qoldanylatyn elderden bizdiń elimizge kelgen sheteldik tikeleı ınvestısııalar aǵyny 391 mlrd AQSh dollaryn qurady nemese bul sheteldik ınvestısııalardyń barlyq kóleminiń shamamen 90 paıyzy boldy.
«Qazaqstan Respýblıkasynyń keıbir konstıtýsııalyq zańdaryna ózgerister men tolyqtyrýlar engizý týraly» Konstıtýsııalyq zań qabyldandy.
Qujattyń maqsaty AHQO-ny jyldam qalyptastyrý men elimizdiń negizgi qarjy tuǵyrnamasy retinde damýyn qamtamasyz etý jáne ınvestısııa tartý úshin onyń ıýrısdıksııasyn paıdalaný bolyp tabylady.
Zań jobasy «ınvestısııalyq rezıdent» uǵymyn engizýdi kózdeıdi, sondaı-aq ınvestısııalyq rezıdentterge beriletin talaptar men jeńildikterdi retteıdi.
Senator Baqtybaı Shelpekov bıýdjetten AHQO-ny qarjylandyrýǵa baǵyttalǵan maqsatty aýdarymdardy qosymsha qun salyǵynan bosatýda usynylyp otyrǵan erekshelikterdi túsindirdi. Sondaı-aq rezıdent emesterdiń AHQO-ǵa kórsetilgen qyzmetteri/jumystary men AHQO-ǵa qatysýshylardyń qyzmetterin qosymsha qun salyǵyn salýǵa jatatyn aınalym dep eseptemeý usynylady.
Zań jobasyna qoldaý bildirip sóz alǵan senator Erbolat Muqaev Qazaqstan Respýblıkasyna kelý vızasyn alý quqyǵyn qamtamasyz etý, AHQO aýmaǵynda áreket etetin aǵylshyn quqyǵymen qamtamasyz etilgen ınvestısııalardyń saqtalý kepildikterimen qosa salyq preferensııalaryn berý sheteldik ınvestorlardy tartýǵa yqpal etetinin atap ótti.
Odan basqa, «Qazaqstan Respýblıkasyndaǵy saılaý týraly» Konstıtýsııalyq zańǵa jalpyǵa birdeı deklarasııalaýdy engizý merzimderin 2020 jyldan 2021 jylǵa aýystyrý bóligine ózgerister engiziledi.
