Aqmolalyq kásipkerler óńir turǵyndarynyń áleýmettik máselelerine udaıy alańdap otyrady. О́ńirde mektep pen bala baqsha, aýrýhanalar qurylysyn qolǵa alyp, tutas aýyldardyń súıenishi bolǵan jomart kásipkerler az emes. Olar «Rýhanı jańǵyrý» baǵdarlamasynyń barlyq 13 baǵyty boıynsha jergilikti bılik organdarymen birlese otyryp ilkimdi jumys isteýde. Máselen, «Qazyna SR» kompanııasynyń dırektory Saıra Mataıbaevanyń Qosshy aýylynda salǵan jańa mektebi ozyq bilim berý úlgisi boıynsha jumys isteýde. Bul jobanyń quny 350 mıllıon teńgeni quraıdy.
– «Rýhanı jańǵyrý» baǵdarlamasyn júzege asyrýǵa óńir kásipkerleri súbeli úles qosty. Bizdiń qoǵam azamattyq bastamalarǵa bet buryp, áleýmettik máselelerdi sheshýde jańa bastamalar usynyp keledi. Oblys aýmaǵynda 2019 jyly «Rýhanı jańǵyrý» aıasynda 3 myńǵa tarta joba júzege asyryldy. «Týǵan jer» baǵdarlamalyq baǵyty boıynsha jalpy sommasy 5,3 mıllıard teńgeni quraıtyn 583 áleýmettik nysan qoldanysqa berildi,–deıdi Aqmola oblysy ákiminiń orynbasary Aına Mysyrálimova.
Aqmolalyq azamattar týǵan ólkeniń tarıhı tulǵalaryn ardaqtap, olardyń ómir jolyn jas urpaqqa úlgi etýdi maqsat tutqan. О́ńir aqyndary men jazýshylarynyń alǵashqy aýdıokitaby bul baǵyttaǵy sony qadam bolmaq.
– Búgingi tańda osyndaı 9 aýdıokitap jaryq kórdi. Olardy tegin «smart rýhanı Aqmola» qosymshasy arqyly uıaly telefonǵa júktep alýǵa bolady. Áleýmettik jelilerde de taratylýda. Keler jyly, ishki saıasat basqarmasynyń qoldaýymen Kókshe óńiri týraly aqyn-jarýshylardyń týyndylaryn jeke jınaq etip jarııalaýdy josparlap otyrmyz,–deıdi óńirlik «Rýhanı jańǵyrý» jobalyq keńsesiniń jetekshisi Qaırat Seıitqazın.
Baǵaly bastamalar aýyl turǵyndary tarapynan da qoldaý taýyp otyr. 1993 jyldan beri aýyl sharýashylyǵymen aınalysyp kele jatqan Orazalınder áýleti týǵan aýyldaryn qamqorlyqtaryna alyp otyr.
– 2019 jyly árqaısysy 8 páterli muǵalimder úıleriniń qurylysyn aıaqtadyq. Osylaısha, aýylymyzǵa kelgen ustazdarǵa 24 páter berdi. Sport alańy salynyp, 6 shaqyrym aýyl kóshesine asfalt tóseldi,–deıdi «Baıdaly» seriktestiginiń dırektory Baǵdat Orazalın.
El jany jomart kásipkerlerge aq alǵystaryn aıtýda.
