«Qasym-Jomart Toqaevtyń negizgi saıası ustanymdarynyń biri – ashyqtyq jáne qoǵammen tyǵyz qarym-qatynas ornatý. Prezıdent «halyq únine qulaq asatyn memleket» konsepsııasyn iske asyrý barysynda halyqpen tikeleı baılanysqa erekshe kóńil bóledi. Turǵyndardyń ótinish-tilekterin der kezinde qaraý úshin Qazaqstan Prezıdentiniń Vırtýaldy qabyldaýy ashyldy.
Búginde oǵan 6673 ótinish kelip túsken. Qasym-Jomart Toqaev brıfıngter men baspasóz máslıhattaryn jıi ótkizip, otandyq jáne sheteldik BAQ-qa suhbat berip turady. Sonymen qatar Twitter jáne Instagram sekildi áleýmettik jelilerdi belsendi qoldanady.
2019 jyldyń 1 sáýirinde ashylǵan Memleket basshysynyń Instagram jelisindegi paraqshasyna jazylýshylar sany 1 mıllıonnan asty. Prezıdent 9 aı ishinde óz paraqshasynda resmı sharalardan, kezdesýler men saparlardan 60 post jarııalady. Qasym-Jomart Kemeluly aldaǵy ýaqytta Instagram jelisinde beıresmı sátterde túsirilgen sýretter men beınerolıkter jarııalaýdy da josparlap otyr» dep jazdy Berik Ýálı.
