«1 qańtardan bastap Densaýlyq saqtaý mınıstrligi mindetti əleýmettik medısınalyq saqtandyrý degen úlken jobany iske qosty. Endi medısınalyq qyzmetter eki paketke bólinedi. Birinshi paket – tegin medısınalyq kómektiń kepildik berilgen kólemi (TMKKK). Muny barlyq qazaqstandyq tegin paıdalana alady. Ekinshisi – MƏMS paketi. Munda buryn aqyly, qymbat bolǵan kompıýterlik tomografııa, MRT, ońaltý sharalary, qymbat medısınalyq qyzmetter men dəri-dərmekter saqtandyrylǵan azamattarǵa ǵana tegin bolady. Qyzmet aqysy saqtandyrý qory arqyly jabylady», dedi Densaýlyq saqtaý vıse-mınıstri Oljas Əbishev.
1 səýirge deıin eldiń barlyq turǵyny shartty túrde saqtandyrylǵan bolyp sanalady jəne olar TMKKK paketi men MƏMS paketine kiretin medısınalyq qyzmetterdi tegin ala alady. Osy kezeńde azamattar ózderiniń saqtandyrý mərtebesin anyqtap, mindetti medısınalyq saqtandyrý júıesiniń qatysýshysy bolýy kerek. Iаǵnı, úsh aı ishinde Telegram-bot arqyly óz mərtebesin teksere alady. «Birinshi kezekte saqtandyrý mərtebesin tekserip alý kerek. Osy jyldyń naýryz aıynyń sońyna deıin barlyq azamat medısınalyq kómektiń kepildendirilgen kóleminde saqtandyrylǵan bolyp sanalady, biraq soǵan qaramastan ərkim óziniń saqtandyrý mərtebesin tekserip alýy tıis. Eger azamat saqtandyrylmaǵan bolyp shyqsa, bank jasap shyǵarǵan tólem termınaldary arqyly júıege jyldam kirýge bolatyn tetikter bar», dedi «Əleýmettik medısınalyq saqtandyrý qory» KEAQ basqarma tóraǵasy Aıbatyr Jumaǵulov.
Onyń aıtýynsha, 2020 jylǵa arnalǵan medısınalyq qyzmetterdi satyp alýda 1277 medısınalyq qyzmet kórsetýshiler qatysqan, olardyń 678-i memlekettik uıym (53%) bolsa, 599-y jekemenshik (47%). Prosesterdi ońtaılandyrý jəne ashyqtyqty arttyrý, sybaılas jemqorlyq təýekelderin jəne əkimshilik kedergilerdi azaıtý úshin medısınalyq qyzmetterdi satyp alý elektrondy sıfrlyq qoltańbany paıdalana otyryp, sandyq formatta Qarjy mınıstrliginiń Elektrondy qarjy ortalyǵynyń veb-portaly arqyly júzege asyrylady.
Jalpy, əleýmettik medısınalyq saqtandyrý engizilgen kezde, densaýlyq saqtaý júıesiniń bıýdjeti medısınalyq kómektiń kólemin 1,5 esege ulǵaıta otyryp, 2020 jyly 1,6 trln teńgeni quraıdy.
Sonymen, ambýlatorııalyq emhanalyq kómekti qarjylandyrý kólemi 2020 jyly 78%-ǵa 740,9 mlrd teńgege deıin ulǵaıady, bul alǵashqy medısınalyq-sanıtarlyq kómekti qarjylandyrý arqyly halyqty profılaktıkalyq sharalarmen tolyq qamtýdy qamtamasyz etedi.
