Sapar barysynda Májilis depýtaty «Moldashev» sharýa qojalyǵynyń jumysymen tanysty. Búgingi tańda sharýashylyq qazaqtyń aqbas sıyry jáne Edilbaı qoıyn ósirýmen aınalysady. Aýyl turǵyndarymen ótken kezdesýde agrarlyq sektordy damytý, jeke mal sharýshylyǵymen aınalysý máselesi kóterildi. Turǵyndar tarapynan birqatar túıtkildi máseleler aıtyldy. Onyń ishinde aýyl turǵyndary uıaly baılanystyń joqtyǵy, Qyzylsaıa jáne Dóńgilaǵash aýyldary arasyndaǵy joldyń tozǵandyǵy depýtattyń nazaryna alyndy. Sonymen qatar, Vladıslav Kosarev óńirdegi irgeli kásiporyn sanalatyn «Altuntau Kokshetau» aksıonerlik qoǵamynda bolyp, ujymmen kezdesti.
Odan buryn halyq qalaýlylary Zerendi aýdanyna at basyn buryp, birqatar áleýmettik nysandy aralap kórdi. Al Atbasar aýdanynda depýtattardyń jumys sapary osyndaǵy agrarlyq-ındýstrıaldyq kolledjdi aralaýdan bastaldy. Kolledj oqytýshylary men oqýshylary meımandarǵa tolǵandyrǵan saýaldaryn qoıyp, jaýaptar aldy.
Atbasar qalasyndaǵy №3 orta mektebiniń ujymymen kezdesýinde depýtattar Qazaqstan Respýblıkasynyń «Pedagog mártebesi týraly» jańa zańyna qatysty kóptegen suraqqa jaýap berip, ustazdardyń sapaly bilim berý máselesi jaıly pikirlerin bildi. Kezdesýde ustazdardyń jalaqysyn arttyrý, jastardyń shet elderge kóptep aǵylýy máselesi keńinen sóz boldy.
Al aýdanaralyq kópbeıindi aýrýhanasynyń qyzmetkerleri depýtattarǵa «Pedagog mártebesi týraly» zańy sekildi «Dáriger mártebesi týraly» zań qabyldana ma degen saýaldaryn qoıdy. Bul kúni Májilis depýtattary atalǵan aýdandaǵy Bastaý selolyq okrýgine at basyn buryp, osynda jańadan ashylǵan dárigerlik ambýlatorııanyń jumysymen tanysyp, turǵyndardyń ótinish-tilekterine qulaq asty.
Zerendi aýdany,
Aqmola oblysy
