Qostanaı oblysyndaǵy «Altyn dala» tabıǵı rezervatyna byltyr ǵana jiberilgen toǵyz qulannyń biri brakoner oǵynan mert boldy. Qoryqshylar 26 jeltoqsan kúni Arqalyq mańyndaǵy Qaıyńdy aýylynan 30 shaqyrym jerde qulannyń moınyndaǵy spýtnık arqyly baqylanatyn GPS qarǵybaýy qozǵalyssyz qalǵanyn baıqaǵan. Oqıǵa ornyna jedel jetken olar janýardyń basy men GPS qarǵybaýyn ǵana tabady. Qulan qulaǵan jerde kólik izi qalǵanyn baıqaǵan olar, dereý sýretke túsirip, Arqalyq qalalyq polısııa basqarmasyna aryz túsiredi.
Bul týraly oblystyq polısııa departamentinde ótken baspasóz jıynynda aıtyldy. Polıseıler oqıǵa ornyna jetkenshe, qulannyń basyn da, kólikten qalǵan izdi de qar basyp qalǵan.
– Bizdiń mamandar qarǵybaýdy ǵana tapty. Qylmysty ashý úshin arnaıy top quryldy. Qazir QR QK-niń 337-baby boıynsha is qozǵaldy. Zańsyz ańshylyq jasaǵandarǵa qatysty aldyn ala tergeý sharalary júrgizilýde, – deıdi Tabıǵatty qorǵaý bóliminiń bastyǵy Talǵat Ahmetov.
Tabıǵat erkesin bassyz qanjyǵasyna bóktergen brakonerler qolǵa túsip, qylmysy dáledense, 5 jyldan 10 jylǵa deıin bas bostandyqtarynan aıyrylýy múmkin.
Nurqanat QULABAEV
Qostanaı oblysy
