Birinshi kezdesý Qazaqstan Respýblıkasy Prezıdenti janyndaǵy Memlekettik basqarý akademııasynyń aımaqtyq fılıalynda boldy. Sharaǵa Akademııanyń jáne elimizdiń memlekettik qyzmet isteri agenttigi oblystyq departament qyzmetkerleri, oblystyq jáne qalalyq máslıhattardyń depýtattary qatysty.
Senat depýtaty Parlament qabyldanǵan zańdarmen tanystyrdy. Senator halyqtyń ál-aýqatyn arttyrýǵa arnalǵan áleýmettik máselelerdi sheshý – zańnyń mańyzdy aspektileri dep sanaıdy.
Parlament joǵarǵy palatasynyń depýtatyna akademııa fılıalynyń jańa ǵımaratyndaǵy ozyq tehnologııalarmen jabdyqtalǵan oqý aýdıtorııalary kórsetildi.
Sársenbaı Eńsegenov jumys sapary barysynda Isataı aýdanyndaǵy Qamysqala aýyldyq okrýgi turǵyndarymen de kezdesti. Senator qatysýshylarǵa óziniń 2019 jylǵy zań shyǵarý jumystaryn habardar etti. S.Eńsegenov Senattyń 2018 jyly 15 aqpanda ótken jalpy otyrysynda mal urlyǵyna qatysty qylmystyq zańnamany jetildirý týraly Úkimet basshysyna depýtattyq saýal joldaǵan bolatyn. Senatordyń usynysy eskerilip, 2019 jyly «Qazaqstan Respýblıkasynyń keıbir zańnamalyq aktilerine qylmystyq, qylmystyq-prosestik zańnamany jetildirý jáne jeke adam quqyqtarynyń qorǵalýyn kúsheıtý máseleleri boıynsha ózgerister men tolyqtyrýlar engizý týraly» zańymen mal urlyǵy boıynsha elimizdiń Qylmystyq kodeksine 181-1 bap bolyp jeke quram engizilgeni belgili boldy. Qylmystyq kodekske engizilgen ózgeristerge aýyl turǵyndary men sharýa qojalyqtarynyń basshylary qýanyshty ekenderin jetkizdi.
Kezdesýge kelgen kásipkerler depýtatqa 2019 jyly sharýa qojalyqtaryn sýmen qamtamasyz etý úshin beriletin sýbsıdııa berilmegenin aıtty. Osyǵan baılanysty «Qazsýshar» mekemesi sharýa qojalyqtarynyń basshylaryn sotqa berýdi kózdep otyr. Bul máseleniń oń sheshilýi úshin sharýalar depýtatqa ótinishterin bildirdi.
Senator kezdesýden keıin 5 adamdy jeke qabyldap, problemalaryn tyńdady.
