Jarystyń basty maqsaty boz kilemde beldeser jasóspirimderdi aldaǵy jaýapty syndarǵa shıratyp, jetildirip, shyńdap aparý bolatyn. Kilem ústindegi baq pen bap synaǵan sátke 15 óńirden 125 sportshy jınaldy. Kókshetaý qalasynyń ákimi Amangeldi Smaıylov balaýsa balýandar beldesýin tamashalaýǵa kelip, osy sátti paıdalanyp, kúresten KSRO sport sheberi, Daǵystan jigiti, búkil sanaýly ǵumyryn Qazaqstanda ótkizgen Ahmet Radjapovpen kezdesip, qapııada múgedek bolyp qalǵan ardager balýanǵa densaýlyq tiledi. Ahmet Bagaýdınulynyń áriptesteri óz attarynan syı-syıapat jasady. Budan soń balýandar beldesýi bastalyp ketti.
–Jyl basyndaǵy jarys jasóspirimder úshin aldaǵy saıystarǵa sara jol ashady. Sondyqtan bolar olar qatysýshylar sany bıyl birneshe esege artty. Qazaq kúresiniń qanatynyń keńge jaıylyp kele jatqanyn sezindik. Árıne, myqtylar jeńiske jetedi. Solardyń arasynan qurama sapynda kúresetin balýandardy irikteımiz, deıdi jarystyń bas tóreshisi Marat Qoıshın.
Qazaq kúresiniń Aqmola oblysynda da qanat jaıyp kele jatqandyǵy qýantady. Bul úrdis úlken sportqa jeteleýdiń bastaýy ispetti.
–Bizdiń aýdanda sońǵy jyldary qazaq kúresi myqtap damýda. Ol aýyl aımaqta da jetilip keledi. Sonyń ıgi nátıjesin kórýdemiz. Oblys quramasynda birneshe sportshymyz óner kórsetýde. Jyldyń alǵashqy jarysyna da kileń myqtylardy alyp keldik, deıdi Arshaly aýdanynyń bapkeri Janaı Ybyraev.
Qazaq kúresinen ótken jasóspirimderdiń irikteý chempıonatynda kúshtileri jeńistiń bıik tuǵyryna kóterildi. Olardyń arasynda bolashaǵynan kóp úmit kúttiretin balaýsa balýandar qazaq kúresi mamandarynyń nazaryna ilikti.
