Qostanaı oblysynda óz áıel, bala-shaǵasyn óltirmek bolǵan qaskóıdiń qolynan polısııa qyzmetkeri qaza tapty. Qańtardyń 19-yna qaraǵan túni ashy sýǵa sylqııa toıyp alǵan 28 jastaǵy Tobyl qalasynyń turǵyny óz úıinde janjal shyǵaryp, otbasy múshelerin pyshaqtap tastamaqshy bolady. Pyshaq alyp shyǵý úshin úıine kirgende, týystary ony syrtynan qulyptap, polısııa shaqyrǵan. Quramynda Darhan Bazarbaev pen Amangeldi Syzdyqov bar patrýl jasaǵy oqıǵa ornyna 6 mınýt ishinde jetedi.
– Úı ıesin ustaý, qaýipsizdendirý kezinde polısııa serjanty Darhan Bazarbaev pyshaq jaraqatyn alady. Qaskúnemniń sýyq qarýyn tartyp alyp, qolyna kisen salyp, otbasyn ajaldan qutqaryp úlgergen tártip saqshysy óziniń jaraly ekenin keıin bir-aq biledi. Bir otbasyn ajaldan qutqaryp qalǵan serjanttyń ózi sol jerde kóz jumady. Dereý jetken jedel járdem qyzmeti de onyń ómirine arasha bola almady. Qazir kúdikti qamaýda. Qylmystyq kodekstiń 99-baby boıynsha qylmystyq is qozǵalyp, sotqa deıingi tergeý jumystary bastaldy, – deıdi oblystyq polısııa departamenti basshysynyń keńesshisi Elena Kasharına.
Polısııa serjanty Darhan Bazarbaevtyń artynda anasy men jary, 4 aılyq uly qaldy.
Nurqanat QULABAEV
QOSTANAI
