«Jolaýshylar tasymaly» AQ bas dırektory Mıhael Kortıýmniń aıtýynsha, eski vagondy jóndeý kezinde tutas metall shanaq pen qańqasynan basqa bólshekterdiń bári tolyqtaı jańartyldy.
«Belarýste kúrdeli jóndeýden ótken jolaýshylar vagon tolyq jańartylyp, kýpe vagonynan plaskart vagony jasaqtaldy. Vagon ishinde endi beınebaqylaý, kondısıoner júıesi, árbir jolaýshynyń otyratyn ornynda qýaty 220V-tyq elektr núktesi, jolserikti shaqyrýǵa arnalǵan sıgnaldy túımeshe, taza sý kýleri, tońazytqysh pen qysqa tolqyndy pesh ornatyldy», dedi bas dırektor.
Kompanııanyń damý strategııasynyń mańyzdy baǵyttarynyń biri – jolaýshylar vagondarynyń tapshylyǵyn sheshý. Osy oraıda «Jolaýshylar tasymaly» AQ vagondardyń sanyna ǵana emes, sapasyna da kóńil bóledi. Qazirgi ýaqytta eski vagondardy jóndeý kestesi ázirlengen. Vagon parkin kezeń-kezeńimen jańartý boıynsha jumystar júrgizilýde. Jyl saıyn vagondar 100 birlikke deıin jańartylmaq.
Jalpy 2016-2019 jyldar aralyǵynda 269 vagon satyp alyndy. Onyń ishinde ótken jyly «Tulpar» JShS vagon jasaý zaýytynyń Reseı tehnologııasy boıynsha qurastyrylǵan 91 jańa vagony bar. 2020 jyly «Tulpar» JShS-nen 118 vagon satyp alý josparlanýda. Onyń 18 danasy – 2020 jyldyń
1 toqsanynda, al qalǵan 100 danasy 2020 jyldyń 4-shi toqsanyna josparlanǵan. Sondaı-aq qyzmet kórsetý merzimin uzartý úshin 85 vagondy kúrdeli jóndeýden ótkizý josparlanyp otyr.
Qazirgi ýaqytta ulttyq tasymaldaýshynyń vagon parki 2200-den asady, onyń ishinde «Tulpar-Talgo» vagondarynyń sany 670.
Aıta keterligi, bir vagondy kúrdeli jóndeýden ótkizý 148 mln teńge turady. Al jańa jolaýshy vagonynyń quny – 400 mln teńge.
