Sonaý 2000 jyldardyń alǵashqy tusynda respýblıka oblystarynda Tilderdi damytý basqarmalary qurylǵan kezde jańa memlekettik qurylymnyń aldynda tilderdiń mártebesin ósirý mindeti turdy. Sondaı-aq memlekettik tildiń qoldanylý deńgeıin keńeıtý arqyly elimizdi mekendeıtin ózge etnos ókilderi tilderiniń de umyt qalmaýyn qamdastyrý kózdeldi. Osyndaı jaýapty shaqta atalǵan basqarmanyń bólim meńgerýshisi, basshynyń orynbasar qyzmetterin G.Tólebaeva abyroımen atqara bildi. Sondaı-aq til janashyry 2011 jyly Aqtóbe oblystyq Tilderdi damytý basqarmasynyń basshysy bolyp taǵaıyndalǵan soń, onyń tikeleı aralasýymen osy máselege qatysty óńirlik baǵdarlama qabyldandy. Ári tilderdi damytýdyń ózekti ári kókeıkesti máseleleri aıqyndaldy.
Sonyń ishinde oblysta memlekettik tildi ornyqtyrýdyń tyń jobalary men tásilderi belgilendi. Onyń bel ortasy men basy-qasynda búgingi áńgimemizdiń keıipkeri, halqymyzdyń namysty ór qyzdarynyń biri bolǵan edi. Sonyń nátıjesinde oblysta tilderge qatysty máseleler ár túrli etnos ókilderi tarapynan tereń túsinistikpen sheshimin taba bilgenniń ózi bir mereı. Budan soń oblysta onyń bastamasy boıynsha tilderdi oqytý men ádistemesin jetildirý máseleleri qolǵa alyndy. Soǵan sáıkes basqarma janynan Tilderdi oqytý ortalyǵy quryldy.
Latyn álipbıine kóshý máselesi qazaqstandyq qoǵamda alǵashqyda ár túrli pikirler týǵyzdy. Osy kezde basqarma basshysy turǵyndar arasynda keń aýqymdy túsinik jumystarynyń óristeýine uıytqy bola bildi. Álbette, kez kelgen istiń deńgeıin túpki nátıje ǵana aıqyndaı alady. Osy oraıda respýblıka jurtshylyǵy arasynda latyn qarpin qoldaý isinde el óńirleri deńgeıine shaqqanda Aqtóbe oblysy aldyńǵy kezekke shyqsa, bul iste Gúlaıym Telmanqyzynyń laıyqty ári qomaqty úlesi men qoltańbasy bar ekeni aıdan anyq. Sondaı-aq ulttyq ónerimizdi ardaqtaý men ulyqtaý jáne qasterleı bilý máseleleri de ulttyń janashyr qyzynyń qanyna o basta sińgen qasıet desek, qatelese qoımaspyz. Aıtalyq, ata-babalardan jetken asyl muramyz – ejelgi aıtys óneri dep túısek, araıly Aqtóbede sońǵy jyldary respýblıkalyq jáne halyqaralyq aıtystardyń shymyldyǵy túrilýine de Gúlaıymnyń tıgizgen septigi kóp. Bul turǵydaǵy eńbegi de eleýli.
Memlekttik qyzmetshi retinde oǵan tán basty qasıetter – bıik adamgershilik, ózine tapsyrylǵan mindetterge qaı kezde de jaýapkershilikpen qaraı bilý ári onyń sapaly túrde oryndalýyn kózdeý ekenin áriptesteri udaıy aıtyp júr. Sonymen birge tilder basqarmasynda jumys ýaqytyn tıimdi, ońtaıly ári uqypty túrde paıdalanýdyń ońtaıly tártipteri ornyqqany da ózge memlekettik mekemeler úırenýge, tálim alýǵa turarlyqtaı is deı alamyz. Búgingi kezde jergilikti memlekettik qyzmette júrgen birqatar basshynyń boıynda kóp jaǵdaılarda bastamashyldyq qasıet jetise bermeıtindigi aıtylyp qalyp júr. Bul jóninen de onyń mártebesi men mereıi ústem. О́ıtkeni joǵaryda aıtylǵan jaıttar onyń bastamashyldyǵy men talapshyldyǵynyń jáne jeke ónegesiniń kórinisi ekeni haq.
Búginde óńirdegi jas jáne orta býyn memlekettik qyzmetshiler Gúlaıym Tólebaevany ustaz ári tálimger sanaıdy. Solardyń biri – Marjan Janasova. Ol óz tálimgeriniń laıyqty baǵyt-baǵdar men jón-joba kórsete bilgenin rızashylyq sezimmen aıtyp berdi. Olarǵa úzdik memlekettik qyzmetshi únemi: "tapsyrma oryndalýymen qundy. Ony atqarý paryz ári mindet. Áıtse de ony oryndaý barysynda memlekettik qyzmetishiniń ózine tán isi men izi jáne tıisti qoltańbasy qalyp jatsa – memlekettik qyzmettiń abyroıy men mártebesi odan ári bıikteı túsedi" deıdi eken. Nesi bar, bul oıly da oramdy, utymdy da utqyr tujyrym ekeni anyq. Endeshe osy túıinmen búgingi materıalymyzdyń núktesin qoıǵandy jón kóremiz.
