Oblys ákiminiń baspasóz qyzmeti taratqan derekke sáıkes, qazir aýmaqtaǵy baqylaý sharalary kúsheıtilgen. Memlekettik shekara jabyq. Al Qytaımen saýda-sattyq baılanys jasaıtyn «Qorǵas» halyqaralyq shekara mańy yntymaqtastyǵy ortalyǵynyń jumysy 15 aqpanǵa deıin toqtatylǵan. Bul ortalyqqa qos taraptan kún saıyn 3 myńnan 5 myńǵa deıin adam kirip, shyǵyp, saýda týrızminiń qyzmetin paıdalanatyn edi. Qaýip seıilmese, shekteý merzimi uzartylady.
Sondaı-aq kórshi el shekarasyna jaqyn mańdaǵy oblys aýmaǵy turǵyndaryn juqpaly indettiń belgileri boıynsha tekserý jumystary nazarda tur eken. Búginge deıin dene qyzýy kóterilgen bir azamat dárigerdiń kómegine júgingen. Onyń shekara mańynda bolǵany anyqtalǵannan keıin mamandar jigit aǵasyn oqshaýlap, tolyqtaı tekserýden ótkizgen. Qajetti synama alynyp, zerthanalyq tekserýden keıin buryn qant dıabetimen aýyrǵan naýqastyń angınasy isip, dene qyzýynyń joǵarylaýyna sebep bolǵany anyqtalypty.
- О́ńir turǵyndaryna koronavırýstan qaýip tóngen joq. Kúdik týǵany ras. Mamandar jedel tekserip, naýqastyń emin anyqtady. Kúdik rastalmady. Al shekara mańyndaǵy ár bekette oqshaýlaý bólmeleri bar. Arnaıy oryn 2-3 tósek oryn jáne basqa da qajet zattarmen jabdyqtaldy. Aýmaqtaǵy barlyq medısınalyq mekemeleri qalypty jumys istep tur. Mamandar obaǵa qarsy arnaıy kostıým, kerek-jaraqpen qamtamasyz etilgen, - deıdi Almaty oblysy ákiminiń baspasóz hatshysy Ǵalymurat Júkel.
