13 jyldan beri jas daryndardyń shyǵarmashylyq áleýetin shyńdap, ónerge degen súıispenshiligin qalyptastyryp kele jatqan «ArtÝm» stýdııasy búginge deıin qanshama talanttardy qanattandyrǵan.
Kórmede usynylǵan 40 týyndyda ulttyq naqyshtaǵy áıel beınesi, tabıǵat kórinisteri men balalyq qııaldyń móldir álemi toǵysqan. Ártúrli tehnıkada oryndalǵan jumystar jas sýretshilerdiń ishki dúnıesin, kóktemgi shabytyn jáne ómirge degen shynaıy kózqarasyn aıshyqtaıdy.
Kórmeni Ulttyq ortalyq mýzeıdiń ǵalym hatshysy Ersin Maralbekuly men Qoǵammen baılanys jáne kórmelerdi uıymdastyrý bóliminiń jetekshisi Anna Kýshenko ashty. Olar kórme qatysýshylaryn kórmeniń ashylýymen jáne kóktem merekesimen quttyqtap, jas sýretshilerdiń shyǵarmashylyǵyna joǵary baǵa berdi. Sonymen qatar, balalardyń óner arqyly óz oıy men sezimin jetkize bilýi − olardyń rýhanı damýy men mádenı tárbıesiniń mańyzdy kórsetkishi ekenin atap ótti.
Sondaı-aq, kórmeniń uıymdastyrýshysy, stýdııanyń kórkemdik jetekshisi − «Tumar-Art» pedagog-sýretshiler odaǵynyń múshesi Anara Nýranova stýdııanyń 13 jyldyq jetistigi týraly aıtyp, osy ýaqyt aralyǵynda kóptegen jas daryndardyń shyǵarmashylyq qabiletin damytýǵa úles qosqanyn atap ótti.
Sonymen qatar, jas sýretshilerdiń eńbegin qoldap kelgen ata-analar men ustazdarǵa alǵys bildirip, balalardyń ónerge degen qyzyǵýshylyǵy men talpynysy bolashaqta úlken jetistikterge jeteleıdi degen senimin jetkizdi.
