Qazaqstan SIM málimetteri boıynsha, qazirgi tańda Ýhan qalasynda qazaqstandyq 98 stýdent bar. Qytaıdaǵy Qazaqstan elshiligi stýdenttermen tikeleı baılanys ornatýda.

«Stýdentterde qajetti nárseniń barlyǵy bar, ózderi bilim alyp júrgen ýnıversıtetter olardy barlyq qajettimen qamtamasyz etýde. Bul medısınalyq buıymdar, sonyń ishinde, birinshi kezekte, maska. Azyq-túlik ónimderi de jetkilikti mólsherde. О́zderińiz biletindeı, Premer-Mınıstrdiń tapsyrmasy boıynsha bizde vedomstvoaralyq komıssııa qurylǵan. Keshe otyrys ótti, qazir biz stýdentterdi kóshirý máselesin pysyqtap jatyrmyz. Bul másele boıynsha Qytaı tarabyna resmı nota jiberildi. Qazirgi ýaqytta marshrýtqa qatysty naqty máseleler pysyqtalýda: ushaq ushyp shyǵady ma, qaıda qonady, adamdardy qaıdan alý qajet bolady degen máseleler qaralýda. Stýdenttermen kelissózder júrgizilip jatyr jáne olardyń sanyna baılanysty arnaıy bortty jiberý máselesin pysyqtaıtyn bolamyz. Dıplomatııalyq ruqsat alý Qytaımen kelisý kezeńinde», - dedi Sh. Nuryshev.

Onyń aıtýynsha, Qazaqstannyń QHR-daǵy elshiligi men bas konsýldyǵy qazir QHR azamattary úshin densaýlyq jaǵdaıy týraly anyqtamany talap etý turǵysynan talaptardy kúsheıtti.

«Úkimettiń sheshimimen QHR azamattarynyń Qazaqstan aýmaǵynda vızasyz tranzıttik 72 saǵattyq kelý tártibi ýaqytsha toqtatyldy. Qazirgi ýaqytta QHR azamattary úshin áýejaıǵa kelgennen keıin elektrondyq vızalardy resimdeýdi toqtata turý týraly sheshim qabyldandy», — dep habarlady mınıstrdiń birinshi orynbasary.

Qazirgi ýaqytta QR SIM málimetteri boıynsha, QHR aýmaǵynda Qazaqstannyń 1300-ge jýyq azamaty bar. Olardyń 635-i Haınan provınsııasynda júrgen 635 týrıst. 204-i elshiliktiń, bas konsýldyqtyń qyzmetkerleri jáne olardyń otbasy músheleri, sondaı-aq qazirgi ýaqytta Qytaı aýmaǵynda júrgen Qazaqstannyń 445 azamaty.

«Keshe QHR SIM-de sheteldik dıplomattarǵa arnalǵan brıfıng ótti, shara barysynda qytaı tarapy óz aýmaǵynda oryn alǵan jaǵdaı týraly aıtty. Árıne, olar barlyq tıisti sharalar qabyldanǵanyn, bári de baqylaýda ekenin aıtty. Qozǵalysty azaıtý úshin azamattaryń múmkindiginshe turǵylyqty mekenjaılarynda qalýyn surady, sonymen qatar, olar shetel memleketterinen shuǵyl ótinish túsken jaǵdaıda sol elderdiń azamattaryn evakýasııalaý jáne shyǵarý máselesin qaraýǵa daıyn ekenin aıtty», — dep atap ótti Sh. Nuryshev.

О́z kezeginde densaýlyq saqtaý mınıstri E. Birtanov Dúnıejúzilik densaýlyq saqtaý uıymy tarapynan jahandyq qaýip-qater jáne shekaranyń jabylýy týraly habarlamalar túspegenin atap ótti.

«Dúnıejúzilik densaýlyq saqtaý uıymy qazirgi ýaqytta halyqaralyq saıahattardy shekteýdi usynbaıdy. Meniń bilýimshe, birde-bir el Qytaımen shekarany jappady. Biz azamattardyń Qytaı shekarasy arqyly ótý trafıgi basqa elderge qaraǵanda birshama ese kóp ekenin túsinemiz, biraq onda mundaı sharalar qabyldanyp jatqan joq. Sondyqtan da úkimettik komıssııa shekarany jabý jóninde sheshim qabyldaǵan joq, degenmen memlekettik jáne memlekettik emes uıymdarǵa Qytaıǵa issaparlardy shekteýdi usynady. Sondaı-aq, azamattarǵa jeke jáne basqa da isteri boıynsha barmaýdy usynamyz. Bul QHR-ǵa baratyn azamattarymyz úshin syn-tegeýrinderdi azaıtý úshin jasalýda», — dedi densaýlyq saqtaý mınıstri.

Qazaqstan bas memlekettik sanıtarııalyq dárigeri Jandarbek Bekshın, óz kezeginde, qazaqstandyqtarǵa ınfeksııa juqtyrǵan bolýy múmkin adamdarmen jáne halyq kóp shoǵyrlanǵan jerlerde maska kıip júrýge keńes berdi. Kóshede maska kııý qajet emes.

«Ashyq ortada bul vırýs ómir súre almaıdy. Eń kóp degende ol tek bir kún ómir súredi. Vırýstyń taralýynyń ońtaıly temperatýrasy 36-37 gradýsqa teń, ıaǵnı bul vırýs adamdar men janýarlardyń aǵzalarynda ǵana ómir súredi. Sondyqtan vırýstyń tamaq ónimderin nemese sálemdemelerdi tasymaldaý arqyly taralýy ekitalaı. Bizge Qytaıdan temir jol kóligimen nemese avtokólikpen ákelinetin taýarlar 2-3 kúnge jýyq ýaqytta jetkiziledi, ıaǵnı vırýs ol aralyqta kúshin joıady. Taǵy bir usynys – azyq-túlikti tutynar aldynda jaqsylap jýý qajet nemese termııalyq óńdeýden ótkizý qajet. Al shıki kókónister men jemisterdi aǵyndy sýmen jýyp, ystyq sýmen shaıý qajet», — dedi J. Bekshın.

Aıta ketý kerek, qytaı jańa jylyn merekeleý kezinde týrısterdiń jappaı jolǵa shyǵýy turǵysynan QHR-dan tys jerlerge ınfeksııanyń taralý qaýpi joǵary.

Epıdemıologııalyq zertteýlerge sáıkes, aýyrǵandardyń kópshiligi Hýbeı provınsııasynyń Ýhan qalasynda ornalasqan Hýanan teńiz ónimderiniń, mal, qustardyń jáne ekzotıkalyq ónimderdiń kóterme saýda naryǵynda jumys istegen nemese óńdeýshiler bolǵan nemese jıi kelýshiler bolǵan.

Búgingi tańda Qazaqstan boıynsha shekaralyq aımaqtardyń ótkizý pýnktterinde, áýejaılar men vokzaldarda koronavırýstyń enýi men taraýyna qarsy is-qımyl sharalary júrgizilip jatyr: kelýshi halyqaralyq avıareısterge teplovızııalyq baqylaý kúsheıtildi, barlyq adamdardyń mindetti baılanyssyz termometrııasy júrgizilýde, áýejaılar, shekara jáne keden qyzmetiniń qyzmetkerlerimen, ushý quramymen, jolaýshylar poıyzdarynyń jolserikterimen profılaktıkalyq jumystar uıymdastyryldy. Áýejaılarda QHR-ǵa shyǵatyn barlyq adamdar úshin jadynama beriledi.

Sonymen qatar, 1406 (Áleýmettik medısınalyq saqtandyrý qorynyń negizinde), + 7 (7172) 76-80-43 call-ortalyǵy uıymdastyrylǵan, oǵan azamattar qońyraý shalyp, álemdegi koronavırýs aýres týraly, sondaı-aq aýrýdyń aldyn alý sharalary men negizgi belgileri týraly barlyq ózderin qyzyqtyratyn aqparatqa táýlik boıy jaýap ala alady.